Child First Foundation, ku ta selebrá su di 12 aniversario e aña aki, a anunsiá e ganadó di e 1.200,00 USD pa e CFF Pabien – Challenge riba djabièrnè ,12 di novèmber 2021 eksaktamente 12 or.
CFF, bòu di presidensía di mener Christian Peterson, su meta ta pa stimulá presensia positívo, aktívo di tatanan, di manera ku yunan por krese bira siudadanonan di mundu éksitoso. Ku esaki CFF ta kontribuí na desaroyo di hende ku ta biba un bida konsiente, produktivo, felis i signifikante. Pa realisá e meta aki, mester pasa den prosesonan ku ta kondusí na konsientisashon tokante kustumber, tradishon i forma di eskpreshon. P’esei CFF a selebrá su su propio aniversario lansando e ‘CFF Pabien-Challenge’.


Meta di e Reto – ‘Pabien’ ta pa legumai e kantika na Papiamentu ‘Salú ku Bolo’ i lag’é pertenesé na pasado. E kantika ei por bai museo. Por kanta e kantika nobo di selebrashon ‘Pabien’ ku sí, kontrali na ‘Salú ku Bolo’, ta felisitá un hende, komponé pa mener Christian Peterson, na tur selebrashon.


Partisipantenan por a publiká nan partisipashon te 9 di novèmber 2021 pa 12’or di anochi riba medionan sosial bòu di menshon di ‘CCF Pabien – Challenge’. E hurado di e reto, ku ta konsistí di representante di CFF Andayé Tecla i kuater èks promé minister, señora Maria Liberia-Peters, señora Mirna Louisa-Godett, mener Stanley Betrian i mener Eugène Rhuggenaath, a skohé e partisipashon mas yamativo i kaluroso, despues di kua presidente di e prestigioso hurado, mener Stanley Betrian a otorgá e premio na e ganadó, Kolegio Iris Bruyning na Bonam.


E partisipantenan tabata varia di individuonan, gruponan musikal i di amigu, te ku famianan i skolnan. Remarkabel tabata e kantidat di partisipashonnan internashonal. E ganadó apsoluto, Kolegio Iris Bruyning, a risibí un premio di 1.200,00 USD na okashon di e di 12 aña di eksistensia di Child First Foundation.


Teksto di e kantika nobo di felisitashon ta:
Pabien riba bo dia.
Nos t’ei pa kompartí.
Hopi aña, hopi aña, hopi aña felis!
Bo ta di fiesta, awe.
Nos t’ei, pa selebrá.
Hopi aña, hopi aña, hopi aña felis!

Child First Foundation ta invitá un i tur pa keda pendiente pa e videoclip di kompilashon di e CFF ‘Pabien – Challenge’ i tambe pa e siguiente reto pa selebrá su di diestres aniversario na 2022. Sin desvelá muchu informashon, por menshoná ku e siguiente reto di CFF lo ta un konkurso di skibimentu, tokante un araña mundialmente konosí i e manera ku e ta duna kontenido na su paternidat.

LEAVE A REPLY

Please enter your comment!
Please enter your name here