Relaciona cu Semana Santa caminda cu nos ciudadanonan tin e custumber di bay campa, Altocomisario di Polis Interino Sra. Irma Gordon ta haci un yamada fuerte na nos campadornan pa tene cuenta cu e condicionnan bao di cual ta otorga e permiso.

E fecha riba cual nos campadornan por cuminsa campa ta diadomingo 10 april 2022 pa 12:00 di merdia. Kiermen riba e fecha y ora stipula ta permiti pa pone trailernan y tentnan riba nos beachnan. Tur obheto cu pone prome cu e fecha y ora stipula polis lo kita esaki E ultimo dia di campa lo ta dia 24 april 2022.

Despues di campamento mester kita tur obheto for di beachnan. Si esaki NO sosode polis lo kita esakinan riba gasto di e campador. Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic.

Ultimo dia pa entrega peticion pa campamento ta diaranson 23 maart 2022 entre 08:00 pa 11:30 mainta y entre 01:00 pa 04:30pm

A añadi Extra condicion na e permiso. Tene cuenta cu e siguiente condicion cu nos ta splica aki bao:

  • Ariba e santo blanco di e beachnan bao ningun circumstancia ta permiti pa haci B.B.Q., na otro parti solamente por haci B.B.Q. cu B.B.Q. pit di gas.
  • Tent y trailernan cu ta uza pa campa mester ta den bon condicion. Mester pone esaki a lo menos 10 meter di e oriya di lama y nan mester ta poni por lo menos 5 meter for di e caminda publico. No cumpli cu e regla aki, polis lo kitanan.
  • Bao ningun forma ta permiti pa reserva tereno pa campamento.
  • No por pone tent, trailer y otro obhetonan cu ta uza pa campa riba otro lugarnan cu ta e lugarnan cu ta destina pa esakinan y cual lugarnan ta destina pa Gobierno.
  • Den e tentnan/trailernan mester tin suficiente recursonan pa loke ta trata dunamento di prome auxilio. (E.H.B.O.)
  • Ta prohibi pa pone na tent/tráiler, obhetonan of plachinan cu no ta cuadra cu moralidad.
  • E campamento mester sosode conforme e condicionan bao di cual a otorga e permiso.
  • Ta prohibi pa core cu vehiculonan di motor, bicicleta, cabay y garoshi riba nos beachnan y principalmente na lugarnan caminda ta destina pa publico.
  • Ta prohibi di pega candela riba nos beachnan.
  • Ta prohibi di bende cuminda, softdrinks, mixdrinks, of cualkier otro tipo di articulo ariba beach sin permiso.
  • Por toca musica solamente for di den e trailer of tent den siman te 10:00 p.m y den weekend te cu mey anochi di tal manera cu no ta molestia otro campadornan. E uzo di sound system/amplifiers etc. ta permiti solamente si otro campadornan no ta sinti molester di esakinan.
  • Ta prohibi pa kap mata, sin permiso.
  • Ta prohibi pa core cu boto y pa ancra esaki den e zwemzone. Tambe ta prohibi pa mara boto na boeinan cu ta destina pa scheepvaart.
  • Ta prohibi e uzo di pallet y carton riba beach. No cumpli cu e regla aki polis kita esakinan.
  • Ta prohibi pa uza e beach of e palo di coconan como toilet.
  • Ta prohibi pa tin cabay y cacho riba beach.
  • Ta prohibi pa e campadornan uza e hutnan pa nan campa, tin cu laganan liber pa e personanan cu ta bin pasa dia.
  • Bao ningun circumstancia mag di susha e beachnan. No mag di laga atras boternan kibra of splinter di glasnan riba beach, ni tampoco pa tira esakinan den lama. Esaki ta conta pa desperdicio tambe.
  • No mag di pasa e permiso pa otro persona.
  • E poseedo di e permiso mester tin esaki den su tent/trailer na un caminda visibel pa polis.
  • E poseedo di e permiso mester tene cuenta cu e tin solamente derecho riba e lugar di campa durante e tempo cu efectivamente e ta campando, prome cu esaki bo no mag di reserva, marca, pone cabuya ect.
  • E poseedo di permiso ta keda responsabel pa cualkier daño na otronan debi na existencia di su tentnan/trailer of otro objeto.
  • Mester sigui estrictamente indicacionnan di polis duna na interes di orden publico y seguridad di persona, bienes y basa riba moralidad.
  • Esun cu no actua conforme e condicionnan bao di cual a e otorga permiso ta wordo considera di a actua sin permiso. E ora ey ta revoca e permiso y bo por haya un multa.

Un recordatorio pa tur campadornan cu e ultimo dia pa haci peticion pa campa ta dia 23 maart 2022. Sigui tur reglanan y sigur bo lo pasa un temporada dushi.

Cuerpo Policial Aruba lo controla durante campamento na tur parti di nos isla.

RELATED ARTICLESMORE FROM AUTHOR