La Cabana Beach Resort & Casino a celebra su aniversario di 35 aña na december aña pasa durante un fiesta grandi di Pasco, pero e celebracionnan ta continua. Dia 21 di september, e resort lo bolbe conmemora e ocasion hunto cu su hunta di Directiva y invitadonan special relaciona cu e sector empresarial.
E aniversario aki ta representa hopi mas cu solamente un fecha importante riba calendario. Ta un celebracion di e hendenan, relacionnan y memorianan comparti cu durante añanan a yuda forma un di e resortnan timeshare mas conoci di Aruba.
Desde su inicio como La Cabana Beach & Racquet Club na december 1990, e resort a crece rond di un idea simpel pero duradero: crea vacacionnan memorabel. Tras di e promesa ey tin un team dedica di colaboradonan, kende cu nan compromiso diario cu hospitalidad a yuda haci La Cabana un destino familiar y acogedor pa generacionnan di bishitante.
Cu apertura di Glitz Casino, situa banda di lobby, e nomber di e resort a cambia durante añanan, y awe e ta conoci como La Cabana Beach Resort & Casino.
E hendenan tras di e experiencia ta hunga un rol clave. Pa un resort, edificio, piscina, restaurant y un ambiente bunita ta solamente parti di e experiencia di e huesped. E calor di un bon bini, e cuido dedica na un camber, atencion na un peticion di mantencion y disposicion pa haci un tiki extra ta loke ta transforma un estadia den un memoria duradero.
E enfoke di La Cabana Beach Resort & Casino riba recurso humano ta refleha e filosofia aki. Cu su cultura “We Celebrate YOU”, e resort ta enfatisa cu cada colaborador ta importante y cu cada contribucion individual ta esencial p’e exito di henter e team.
Training, desaroyo profesional, beneficionan pa empleado, programanan di reconocemento y oportunidadnan pa crece profesionalmente ta forma parti di e compromiso cu La Cabana ta mantene cu su personal.
E balor di servicio di largo plazo ta specialmente importante den industria di hospitalidad. Colaboradonan cu a traha hopi aña na e resort ta carga cu nan un comprension profundo di su historia, standardnan y expectativa di miembronan cu ta bolbe añanan tras aña.
Nan ta aporta tambe algo cu no por siña di un dia pa otro: familiaridad, continuidad y conexionnan personal cu ta haci bishitantenan sinti nan mes na cas.
Desde su apertura, La Cabana Beach Resort & Casino ta celebra e compromiso aki tur aña y durante cada kwartaal, reconociendo excelencia entre colaboradonan y gerentenan, manera tambe honrando esnan cu ta retira despues di añanan di servicio cu a laga nan propio legado den historia di e resort.
Durante añanan, e resort a construi relacionnan basa riba lealtad. E aniversario tambe ta un oportunidad pa reconoce e miembronan timeshare di La Cabana Beach Resort & Casino. E propietarionan aki a mantene un compromiso duradero cu Aruba y su hendenan, regresando tur aña na un lugar cu pa hopi di nan a bira parti di nan tradicion familiar.
Pa hopi propietario timeshare, e balor di La Cabana Beach Resort & Casino ta bay mucho mas leu cu simplemente e acomodacion. Ta e emocion di bolbe na nan isla preferi, e familiaridad cu e ambiente y placer di reconecta cu hende y lugarnan cu nan conoce di bishitanan anterior.
Cu tempo, un destino di vacacion por bira un segundo cas.
E lealtad ey merece un agradecimento sincero. Miembronan a contribui na continuidad di e resort, mientras cu nan feedback y expectativa a yuda forma e experiencia di huesped.
E relacion entre nan y La Cabana Beach Resort & Casino ta un parti importante di identidad di e resort mientras e ta wak pa dilanti pa futuro.
Durante su aniversario di 35 aña, La Cabana Beach Resort & Casino ta reconoce e dos elementonan esencial di hospitalidad: e hende cu ta crea e experiencia, y huespednan cu ta bolbe pa disfrut’e.
E inversion continuo den mehoracion y renobacion di e propiedad, e desaroyo di su colaboradonan y reconocemento di bishitantenan fiel ta forma e base pa e proximo capitulo di La Cabana.
Awor cu un otro celebracion ta acerca cu hunta di Directiva y invitadonan special di sector empresarial, e mensahe principal ta uno di gratitud.
Na e colaboradonan kende nan dedicacion a sostene e resort durante añanan, y n’e miembronan timeshare fiel cu ta bolbe aña tras aña: danki pa forma parti di historia di La Cabana.
Trinta y cinco aña ta un gran logro.
E relacionnan construi durante e caminda ta su berdadero legado.
