Awe sigur ta un dia tristo pa Aruba y sigur pa esnan cu a vota pa 21 parlamentario haci nan trabao debidamente y sirbiendo interes general. Awe mas bien el a bira un reunion basa riba atakenan infunda contra presidente di Parlamento pa trata na hustifica e falta di madures. Durante e reunion publico aki a keda demostra e falta di conocemento di reglamento di ordo di Parlamento, falta di conocemento di e Ley di Ombudsman cu a ser aproba unanimamente y sigur e falta di comprencion di e importancia di ley aki pa por tin nos ombudsman y kinderombudsman cu lo mester sali na defensa di esnan mas vulnerabel den comunidad.
Cambio di constitucion pa ancra ombudsman atendi den comiccion di Parlamento
Parlamento di Aruba a institui dos comision. Uno tabata e comision di Ombudsman cu ta consisti di miembronan di cada fraccion den Parlamento y hunto a logra keda cla cu e ley aki cu unanimamente a ser aproba den Parlamento na 2020. E otro comision cu ainda ta activo ta e comision yama versterking democratisch staatsbestel y esaki tambe ta consisti di parlamentario di tur fraccion den Parlamento hunto cu DWJZ, Sra Hellen van der Wal y sr Arie Swaen. Durante e reunionnan di comision a trata e cambionanan di constitucion, cambionan cu a ser treci hunto cu huristanan di DWJZ, y e miembronan di comicion a bin cu e cambionan proponi y hunto a yega na un consensus pa pasa pa e ultimo fase cual ta atende cu e Ley di Ombudsman den un reunion publico. Sinemabrgo, despues di a sinta den e comision y despues di a yega na un consensus diripente a bin 8 amienda riba mesa durante e reunion publico na 2021. Awe nos a reanuda y tambe termina e reunion aki cu lastimamente sin un hustificacion valido a keda sin ser aproba. E cambionan constitucional tawata clave y di gran importancia. Asina tambe trabaonan di añas a cay na awa y mas pio e mesun trabao di Parlamento.
Falta di conocemente total riba e ley di ombudsman y cambionan constitucional
Awe pueblo por a mira parlamentarionan desvia atencion cu prijs di gasolin y otro temanan cu ta di nan interes pa no mester bay den debate riba e contenido di ley, paso nan no a prepara nada. Awe pueblo por a mira e falta di madures den Parlamento, pero sigur sirbimento partidista of ego personal. Si nan a tuma e tiki tempo pa lesa articulo 5 di e ley di Ombudsman nan por a tuma nota cu pa nombra un Ombudsman ta un caminda hopi largo, transparente, pero sigur uno cu ta unico den Reino. Parlamento di Aruba a aproba un profielschets unanimamente cu ta e base pa e Voorziter di Raad van Advies, e voorzitter di Algemene Rekenkamer y e presidente di Gemeenschappelijke Hof van Justitie pa nan atende cu e proceso di busca 3 candidato pa ombudsman. E 3 nombernan aki ta bin parlamento y cu 2/3 di sosten por nombra un di 3 candidatonan proponi como e ombudsman. Den Reino Hulandes e proceso di nombracion ta bay cu mayoria di voto, pues nos a pone un mecanismo di extra control. Y pa kita un Ombudsman ta un caminda largo y sigur despues di scucha Raad van Advies por dicidi si tin suficiente motibo pa kita un Ombudsman. No ta cuestion di yega kita manera ta trata na pinta na pueblo.
Awe pueblo di Aruba a wak cu hasta si e ley a pasa, pa nombra un Ombudsman ta casi imposibel na Aruba cu 2/3 parti
Awe Aruba a siña un les. Pueblo awe a sinti un tiki di e inmadures politico of miho bisa e sirbimento personal of e sirbimento partidista cu no ta na beneficio di pais Aruba su desaroyo. Awe pueblo por a wak con e 2/3 parti por funciona. Laga nos haci cu e ley a pasa di ancramento di Ombudsman. A cana e proceso y tin 3 candidato y unda mester 2/3 parti pa nombra e ombudsman. E decicion awe tambe lo tabata e mesun resultado politico si oposicion sera pa vota contra y Aruba hamas lo no por haya su ombudsman of si coalicion dicidi di sera cabes, tampoco lo tin Ombudsman. Pues kizas pa e motibo aki den Reino ta escoge Ombudsman cu mayoria y lo ta bon pa pensa riba esaki paso awe caba a wak con esaki por bay den practica y hamas y nunca nos lo por haya un Ombudsman, paso desicion ta ser tuma cu sentimento politico y no cu sentimento pa pueblo y e sufrimento di e grupo mas vulnerabel.
Awe ta un bon les pami sigur cu mester evalua si ta 2/3 part nos kier pa nombra un ombudsman. Awe a ser demostra con influencia politico ta traha den un sistema di 2/3 parti pa nombra un Ombudsman lo por ta. Kizas ta pesey den reino e ta mayoria?
Mas cu nunca mi ta pidi madures politico pa trata temanan importante y no busca hustificacion pa no sostene un cambio na bienestar di esnan mas vulnerabel den nos comunidad. Nos mag di tin diferencia di opinion cual ta algo sano, bo por desgaba y maltrata e presidente di Parlamento y sigur hunto boso por busca tur excusa sin base pa trata na daña su imagen, pero hamas bo por usa e hustificacion ey pa no sostene un bunita ley di parlamento cu lo beneficia esnan mas vulnerabel den comunidad y principalmenete nos muchana cu mester di e kinderombudsman.
Mi ta comprometi mas cu nunca pa haci esaki realisabel, paso mi a ser poni pa traha na bienestar di Aruba y sigur lo sondea tur posibilidad pa percura pa Aruba tin su Ombudsman mescos cu a persevera pa Aruba tin su ley di screening di Ministers.
