Lider di Fraccion di AVP, Jennifer Arends-Reyes, ta invita miembronan di partido pa participa na Congreso di AVP diasabra 4 di october, di 9:00 pa 11:30 di mainta na Marriott Ballroom. Segun dje, e relevo di liderazgo ta un oportunidad pa uni experiencia cu talento nobo y sigui traha pa e progreso di Aruba.
“AVP tin un historia largo cu un nificacion grandi pa nos pais. Den momentonan determinante, nos partido a asumi reto y responsabilidad. Awe, den 2026, nos ta enfrenta reto nobo, pero nos meta ta keda mescos: traha pa progreso di Aruba y pa bienestar di su pueblo,” Arends-Reyes a expresa.
El a destaca cu e trabou ey ta toca tur parti di bida diario. For di enseñansa y salud te na infrastructura, husticia y oportunidadnan pa comerciante y tur ciudadano por igual, tin asunto cu ta pidi atencion y solucion. Segun Arends-Reyes, den diferente area cu a keda atras durante añanan, awor ta tomando paso pa atende e necesidadnan di comunidad.
“Pueblo na prome lugar semper ta den e conviccion y e trabou di AVP. Nos kier pa cada persona sinti cu ta scucha nan, pero tambe pa nan mira resultado,” el a bisa. “Sea bo ta buscando miho enseñansa pa bo yiu, miho acceso na cuido of oportunidad pa bo negoshi, nos ta traha riba e puntonan cu ta importante pa bo.”
Arends-Reyes a bisa cu e Congreso ta marca un paso den e era di relevo: sigui cu e experiencia cu partido a acumula y, na mes momento, habri espacio pa talento nobo contribui. E ta haci un yamada na miembronan pa bin participa den e momento importante aki pa futuro di AVP.
“Un cos ta sigur: nos ta sigui traha cu curason y alma pa tur hende cu ta biba na nos dushi Aruba.”
