Lider di fraccion AVP den Parlamento, Sra. Jennifer Arends-Reyes, a pone enfasis durante un reunion publico riba un tema cu ta toca tur famia na Aruba: e poder di compra y e manera cu tension geopolitico mundial ta impacta costo di bida y stabilidad economico di nos pais.
Segun Arends-Reyes, e situacion internacional actual ta crea presion significativo riba hopi pais rond mundo. Aruba, como un economia chikito y altamente dependiente di importacion, inevitablemente ta sinti e efecto di e desaroyonan aki. Subida den prijs di combustibel, aumento den costo di transporte y interupcion den cadena di suministro internacional ta traduci directamente den prijs mas halto pa cuminda, energia, awa y otro producto esencial cu ta forma parti di bida diario di cada hogar.
Arends-Reyes a reconoce cu e preocupacion den comunidad ta legitimo y cu hopi famia ta sinti presion financiero cada dia mas fuerte. Sin embargo, su persona a enfatisa cu Gobierno di Aruba no ta warda pa impacto yega, sino ta traha activamente hunto cu diferente stakeholder pa prepara e pais pa eventual cambio economico y pa proteha poder di compra di ciudadano.
“Gobierno ta tuma decision basa riba analisis serio, monitor continuo di desaroyonan internacional y planificacion responsabel,” Arends-Reyes a declara. “Nos ta traha cu un enfoke disciplina pa asina por actua na tempo y di forma efectivo ora mester.”
Segun e informacion presenta recientemente den Parlamento, Gobierno ya a implementa varios medida concreto pa mitiga impacto di subida di prijs internacional riba ciudadano. Entre e accionnan destaca ta un reduccion temporario di accijns riba combustibel, medida pa mantene stabilidad den prijs di utilidadnan, y continuacion di iniciativa social pa sostene poder di compra, manera asistencia pa hogar vulnerabel y pensionado. Ademas, Gobierno ta uza un modelo di scenario y monitor continuo pa anticipa desaroyo y tuma decision prudente sin pone stabilidad financiero di pais na riesgo.
Arends-Reyes a enfatisa cu esaki ta evidencia di un gobierno cu ta actua cu responsabilidad y vision. Segun su persona, liderazgo den momento di incertidumbre mundial ta exigi serenidad, cooperacion y disciplina fiscal, y no decisionnan impulsivo cu por crea problema mas grandi riba largo plazo.
Fraccion di AVP a indica cu e reto actual tambe ta presenta un oportunidad importante pa Aruba fortalece su resiliencia economico. Pa logra esaki, su persona a propone cu pais mester sigui inverti den produccion local, agricultura y pesca, pa reduci dependencia riba importacion. Tambe, Arends-Reyes a pone enfasis riba importancia di acelera transicion pa energia renobabel, un paso cu no solamente ta contribui na sostenibilidad ambiental, sino tambe ta reduci vulnerabilidad di Aruba pa fluctuacion di prijs internacional di energia.
“Nos mester mira e reto actual no solamente como un riesgo, pero tambe como un oportunidad pa construi un economia mas fuerte, mas diversifica y mas resistente,” Arends-Reyes a expresa.
Den su declaracion, Arends-Reyes a subraya importancia di colaboracion entre gobierno, sector priva, sindicato y comunidad. Segun su persona, solucionnan sostenibel ta depende di dialogo constante y participacion activo di tur sector den sociedad.
Ademas, Arends-Reyes a haci un yamada pa reforza control y transparencia riba prijsnan, pa preveni abuso y pa proteha consumidor, specialmente na momento cu mercado internacional ta instabiel. Su persona a enfatisa cu confianza publico ta basa riba transparencia, comunicacion cla y accion consistente di gobierno.
Finalmente, Arends-Reyes a conclui cu e meta principal di gobierno mester ta un Aruba unda pueblo ta sinti proteha y prepara pa futuro, incluso den un mundo cu ta cada bes mas impredecibel.
“E situacion mundial actual ta un prueba pa nos capacidad como pais,” Arends-Reyes a declara. “Pero cu planificacion responsabel, cooperacion entre stakeholder y decisionnan bon pensa, nos por construi un Aruba mas fuerte, mas sostenibel y mas prepara pa e futuro.”
