Kico un aumento di salario minimo realmente ta bal, si despues di cobra mas, un trahador mester paga mas na supermercado, pa servicio y pa e necesidadnan basico? Pa lider di PPA, Otmar Oduber, esey ta e pregunta fundamental cu Gobierno mester contesta, prome cu implementa un aumento salarial di gran magnitud.
Durante conferencia di prensa, Oduber a enfatisa cu PPA no ta contra aumento di salario minimo. Al contrario, e partido ya a inclui e pensamento aki den su programa electoral di 2024 como un proposicion concreto, pa acerca salario minimo gradualmente na e ‘bestaansminimum’. “Nos ta na favor di aumento, pero no di decision populista cu despues pueblo mes mester paga,” Otmar a enfatisa.
Un plan di dies aña, no un decision di ultimo momento
Segun Oduber, PPA a propone un trayectoria di dies aña pa cera e gap entre salario minimo y ‘bestaansminimum’, combina cu compensacion pa inflacion y efecto di reforma fiscal.
E proceso mester sosode den consulta cu trahador, empleador y otro stakeholders, pa evita cu un medida destina pa yuda pueblo, ta termina na crea instabilidad economico.
E peligro di un aumento sin plan
Oduber ta alerta cu aumento di costo laboral por afecta e empresanan y eventualmente pasa pa consumidor, mediante e aumento di e prijsnan. P’esey, PPA ta propone tambe un programa nacional pa aumenta productividad laboral, modernisa legislacion laboral (PEL) y reduci costo di haci negoshi. Segun Otmar mester tene cuenta cu: “No ta solamente cuanto un trahador ta gana, sino ta cuanto e por cumpra cu loke el a gana.”
Compartimento di ganashi como alternativa
Oduber a destaca un otro proposicion di PPA: un sistema di participacion economico laboral, caminda e empresanan cu registra ganashi, por comparti un parti cu su trahadornan, segun acuerdo y desempeño, combina cu incentivo fiscal.
E intencion ta pa trahador beneficia di resultado economico, sin cu tur mehoracion di ingreso mester depende exclusivamente di aumento salarial obligatorio.
“Bienestar economico no por bira un lucha di ego”
Oduber ta critica e diferencia entre e partnernan di coalicion tocante salario minimo, unda ta obvio cu ta poniendo interes di partido dilanti di un debate economico serio. Pa PPA, e pregunta no ta cua partido ta gana e discusion, sino si e trahador realmente lo progresa.
“Subi salario minimo por ta un decision politico. Pero logra cu pueblo realmente ta biba mihor, ta exigi vision, responsabilidad y un plan economico complete, no manera cu e gobierno ta haciendo actualmente,” Otmar Oduber a expresa.
