Recientemente Parlamento di Aruba den su totalidad a aproba e ley nobo di Wega di Placa.
E sectornan di casino, loteria y catochi ta cai bou di e ley nobo aki. E ordenasa nobo ta regla entre otro e lantamento di un organo di supervision riba Wega di Placa, esta un Gaming Control Board o mihor bisa e ‘Kansspelautoriteit’.
Actualmente Fundacion Lotto pa Deporte ta e unico portador di licensia di loteria aki na Aruba. E licensia ta basa riba un Decreto Ministerial (MB) di dia 29 mei 1991. E maneho desastroso di e directiva saliente a pone cu na 2011 e fundacion a sera un contracto cu Canadian Bank Note (CBN) pa e maneho diario di loteria y catochi. Cu otro palabra Lotto pa Deporte mes no ta usando e licensia, sino a duna un compañia di Canada pornada e derecho di usa e licensia.
Al contrario ta Lotto pa Deporte mester paga CBN boshi placa. E pregunta valido den pueblo ta, anto cuanto divisas di Aruba a bai Canada caba?
Ta obvio cu e Kansspelautoriteit ningun momento lo bai acepta cu Lotto pa Deporte e portador di licensia sigi opera, por medio di CBN, e negoshi di loteria mientras cu tin un capital negativo (den cora). Bo por compara esaki manera e supervision di Banco Central di Aruba riba institutonan finansiero manera un banco. Hamas Banco Central di Aruba ta bai permiti cu un banco ta sigi opera cu un capital negativo. Banco Central di Aruba tin e autoridad legal pa exigi esunnan responsabel pa hinca capital den e banco pa kita e rood, sino ta interveni.
Ta di spera cu e Kansspelautoriteit tambe lo bai exigi e actual gerencia di Lotto pa Deporte pa clear e capital negativo, sino hasta por revoca (‘intrekken’) e licensia di e fundacion.
Revocando e licensia ta pone cu CBN tambe lo muri na caminda hunto cu Fundacion Lotto pa Deporte. Es mas sin licenisa Fundacion Lotto pa Deporte ta stop di existi. Asina ta haya espacio pa duna un otro instituto cu si ta financieramente sano un licensia di loteria. Ta mas cu claro cu un organisacion cu ta biba den capital negativo no ta financieramente saludabel.
Kiko tin cu pasa awor?
Awel e Hunta di Supervision nobo di Fundacion Lotto pa Deporte mester exigi director Roland Tuitt cu ta responsabel pa e maneho finansiero pa clean up e capital negativo di e fundacion, sino e tin cu retira como director. Ja, cu Lotto tin risico di perdi e licensia. Mesora ta surgi e pregunta con director Tuitt ta bai deal cu e trahadornan di Lotto cu tin nan obligacion di cas si Lotto perde e licensia? Clean up no kier min bai fia mas placa na banco. Di otro banda e mundo finansiero lo ta hopi cuateloso pa duna Lotto pa Deporte fiansa sin garantia di gobierno di Aruba o garantia di CBN. Lotto pa Deporte riba su mes forsa awor aki NO lo por haya placa fia di ningun instituto finansiero, pasobra e fundacion ta atrobe den ICU (Intensive Care Unit).
Ta importante pa menciona cu na final di 2009 ningun momento Lotto pa Deporte su capital tawata negativo. Al contrario den e rapport 2009 di accountant ta poni cu e fundacion a sera aña 2009 cu un capital positivo di Afl. 10.195.111. By the way otro pregunta di Mini Mega Plus ta si e Kansspelautoriteit lo aproba e credentials (integridad etc.) di Roland Tuitt como director di Lotto pa Deporte?
