E seis islanan Caribense ta para dilanti reto urgente pa sigura crecemento economico y bienestar amplio pa futuro. Pa mehora e siguridad di existencia, laga e economia crece y fortifica e posicion di e islanan den e region, e Gabinete ta bay na obra p’esey cu tres prioridad. Esaki secretario di estado Eric van der Burg ta skirbi den e Carta di Maneho di Relacionnan den Reino. Secretario di estado Van der Burg:
“Habitante y empresario mester por conta cu un gobierno cu ta logra resultado y ta tuma paso concreto cu ta notabel den nan bida diario. Esaki ta e punto di salida cu ta duna direccion na ehecucion di e acuerdo di gobernacion pa parti Caribense di Reino. For di Den Haag nos ta compromete nos mes conhuntamente cu e paisnan y e islanan pa yega na resultado visibel pa e habitantenan. Maneho nobo na Hulanda Europeo lo wordo introduci basicamente na Boneiro, Sint Eustatius y Saba, a menos cu tin motibo di peso pa no haci esaki. Asina nos ta percura conhuntamente pa nos bay dilanti denter di Reino.”
Prioridad 1: Construi riba un gobernacion decisivo cu ta logra resultado
Hunto cu Boneiro, Sint Eustatius y Saba, e gabinete aki ta enfoca riba fortificacion di gobernacion publico: un gobierno decisivo y integro y cuadro legal cla. Ta sigui traha riba e accionnan cu a cuminsa cu e Agenda di Bon Gobernacion pa Hulanda Caribense, e revision di e leynan WolBES y FinBES y Ley di ampliacion di consehonan insular. Pa yuda preveni situacion preocupante manera esun na Selibon, gabinete ta fortifica capacidad di ehecucion y di gobernacion. E gabinete ta sigui atende cu violacion di integridad, pasobra un gobernacion integro y fuerte ta base pa confiansa den gobierno. Asina, for di e aña aki, Boneiro, Sint Eustatius y Saba ta participa den e Monitor di Integridad y Siguridad. Servicio publico na Hulanda Caribense lo mehora mas ainda. Meta ta pa trece esaki na un nivel igual cu esun di Hulanda Europeo – online, via telefon y na bali.
Prioridad 2: Fortifica resiliencia social y economico y desaroyo sostenibel
E gabinete ta sostene desaroyo economico y autosuficiencia di e islanan. P’esey ta institui Plataforma di Economisch Groeiplatform Carib (Crecemento Economico Carib) pa conecta innovacion, empresario y capital na e seis islanan y den region miho cu otro. Banda di esaki, Instituto Nacional di Inversion cu ta bay institui nobo, lo habri pa parti Caribense di Reino. Esaki ta sosode den colaboracion cu e ministerionan di Asuntonan Exterior, Asuntonan Economico y Finansa. Tambe ta bin un fondo cu cual empresario manera cunukero y piscado por haya acceso na financiamento pa, por ehempel, amplia nan negoshi. Pa atende cu pobresa na Boneiro, Sint Eustatius y Saba na un manera mas firme, gabinete ta pone €30 miyon structuralmente disponibel entrante aña 2027. E placa aki ta destina pa medida cu ta contribui na un minimo di existencia digno y na reduci e costo di bida.
Prioridad 3: Colaboracion efectivo denter di Reino
Si ta depende di e Gabinete lo bin un Conferencia di Reino pa probecha miho di e oportunidadnan pa colaboracion cu Aruba, Corsou y Sint Maarten y pa fortifica esakinan structuralmente. Esaki mester bira un combersacion recurente entre e cuater gobiernonan den Reino. Den esaki lo discuti desaroyo relevante, asunto y oportunidad pa colaboracion denter di Reino. Asina, por ehempel, desaroyo geopolitico por ofrece oportunidad nobo pa colaboracion regional, specialmente riba tereno manera energia, comercio y logistica.
E gabinete lo sigui elabora riba e prioridadnan aki den e proximo periodo, hunto cu e paisnan y e islanan.
