Pa Marco Valentino Christiaans, añanan di experiencia den y rond di AVP a permitie presencia diferente etapa den desaroyo di partido y di Aruba. Mirando bek riba e trayectoria ey, un elemento ta keda particularmente importante p’e: mantene conexion cu pueblo.
Marco ta recorda un epoca caminda dentro di AVP tabatin intercambio constante tocante loke tabata pasando den comunidad. Miembronan tabatin espacio pa comparti loke nan tabata tende, expresa nan punto di bista y evalua hunto cua tabata e necesidadnan cu pueblo tabata sinti.
Pa Christiaans, esaki tabata importante pasobra politica no por wordo haci na distancia. Pa por determina un direccion, bo mester conoce e realidad di hende y comprende kico comunidad ta spera di su representantenan.
E ta un principio cu, despues di tantos aña, ainda Marco ta considera relevante.
Cada tempo ta trece un realidad nobo
Door di añanan, Marco a mira Aruba transforma enormemente.
E ta recorda un isla cu tabatin otro ritmo y otro realidad. Como ehempel personal, e ta pensa bek na Cero Pela, caminda su famia tin su raiz y caminda un tempo tabatin mucho mas espacio entre casnan. Awe e area, manera hopi otro parti di Aruba, a conoce un gran desaroyo.
Pa Marco, e cambio aki ta mustra cu cada generacion ta haya un Aruba diferente den su man.
Desaroyo ta trece necesidad nobo, y esey ta exigi cu liderazgo tambe sigui evoluciona. Vivienda, infrastructura, mobilidad, enseñansa, trabou, turismo y deporte ta algun di e areanan cu, den su reflexion, ta sigui pidi vision y atencion.
Marco ta mira e progreso cu satisfaccion. Pero p’e, progreso tambe ta significa sigui pensa dilanti: comprende unda Aruba ta bay y prepara pa e necesidadnan di futuro.
Diferente generacion, diferente liderazgo
Durante su trayectoria, Marco a presencia diferente estilo di liderazgo dentro di AVP.
E ta recorda Henny Eman como un lider firme, cu tabata dedica atencion na intercambio dentro di partido y na loke miembronan tabata trece for di comunidad.
Di Mike Eman, Marco ta papia cu gran aprecio di su manera calmo y trankil di acerca situacionnan. Loke particularmente e ta aprecia ta e disposicion pa sigui busca solucion y crea espacio pa dialogo.
Pa Marco, cada lider y cada generacion naturalmente ta trece su propio estilo.
Y ta precisamente ey caminda ta conecta cu Era di Relevo.
“Partido no por keda para”
Marco ta mira relevo como un parti natural di desaroyo di un partido.
Un generacion nobo ta trece idea nobo, pensamento nobo y otro manera di mira e realidad. Y segun e, esaki ta necesario, pasobra mundo rond di nos tampoco ta keda para.
Cada tempo tin su reto.
E generacionnan anterior a duna nan contribucion segun e realidad cu nan a encontra. Awor, un siguiente generacion ta preparando pa haci mescos: conoce loke a wordo construi, scucha pueblo y determina con pa responde na e necesidadnan di Aruba di awe y di mañan.
Pa Marco, futuro ta pidi personanan cu por mira hancho y mira dilanti, pero cu na mes momento no perde e conexion cu comunidad.
Despues di a presencia tanto cambio den Aruba y dentro di AVP, su mirada riba e siguiente etapa ta uno di continuidad y renovacion.
Aruba ta sigui cambia. Generacionnan ta sigui cambia. Y cada generacion ta haya su oportunidad pa contribui.
Ta den e espiritu ey cu Marco ta mira Era di Relevo: un siguiente generacion cu ta prepara pa asumi responsabilidad, trece su propio idea y sigui construi riba e caminda cu otro a habri prome.
Congreso AVP 2026 – Era di Relevo, 4 di october 2026
