Arubaanse Voetbal Bond (AVB) a anuncia oficialmente e gran final di futbol den e categoria Menor (U-15) Plata. E partidonan decisivo lo tuma luga e diadomingo aki, caminda S.V. Master Boys y S.V. Caiquetio lo enfrenta otro pa determina cua ekipo lo bay cas cu e titulo di campeon di Aruba.
Despues di un temporada intenso, e dos ekiponan aki a logra habri caminda pa final, demostrando nan talento y disciplina riba tereno. E wega ta programa pa tuma luga dia 19 di april proximo pa 9:00 di mainta riba tereno di Centro Deportivo Guillaime Trinidad (CDGT) na Dakota.
Reglanan di e encuentro: Segun e regulacionnan di AVB pa e final aki, si na final di e tempo reglamentario e marcador keda empata, no lo tin tempo extra. En bes di esei, lo pasa directamente pa e tanda di tiro di penal. Cada ekipo lo tin derecho riba e prome cinco tironan reglamentario, y si e igualdad persisti, lo sigui cu e sistema di “sudden death” te ora cu surgi un ganador.
Logistica y protocol: E ambiente pa e final aki lo ta uno di altura. E organisacion a confirma cu e hungadonan lo sali riba tereno bou di e tononan di e Himno di FIFA, sigui pa nos Himno Nacional, “Aruba Dushi Tera”. Porta di e stadion lo habri un ora prome cu e wega, esta pa 8:00 di mainta, pa ricibi e fanaticada.
AVB a pidi e entrenadornan pa percura pa e keintamento (warming-up) tuma luga trempan, garantisando asina cu e partido por inicia precisamente na e ora stipula. Tambe a informa cu cada organisacion por tin un maximo di cinco adulto riba banki, cumpliendo cu e protocolnan di e liga.
Premiacion: Pa loke ta e ceremonia di clausura, AVB lo conta cu un fotografo oficial pa capta e miho momentonan di e wega y e entrega di trofeo. Tanto e ekipo campeon como e sub-campeon lo ricibi un copa y 25 medaya como reconocimento pa nan esfuerso durante e campeonato.
E fanaticonan di tur dos ekipo por haci uzo di e tribuna parti ariba (sin dak), caminda AVB lo tin su cashier disponibel pa e entrada. Directiva di AVB ta desea tur dos organisacion hopi exito den e gran final aki, sperando un partido bisto y den un ambiente di deporte sano.
