Siman pasa, despues di hopi insistencia, e tour operatornan a logra reuni cu dos minister, Herdé y Cicilia.
Algo cu e tour operatornan a purba pa casi 3 luna, pero sin resultado. Den e reunion cu esun minister, nan ta punta dede riba e otro minister. Ningun minister sa kico pa haci. Y esun na cabes mes, e minister president a keda scondi pa nan.
Loke e dos ministernan Herdé y Cicilia a declara despues di e reunion, tabata puro mentira. Esun cu a resalta tabata minister Herdé di Infrastructura. Ora un minister ta recuri na mentira ora e ta bou di presion, e no ta un persona di confia. Aki algun di e mentiranan “for the record”.
• gobierno anterior a cera e caminda: ningun dia e gobierno anterior a cera un caminda. Al contrario a bay mesa pa dialoga pa yega na un sistema cu ta tene cuenta cu tur interes, te dia gobierno a cay. E gobierno cu a bin despues nunca no a haci nada
• no ta gobierno a cera e caminda, ta abogado a cera e caminda: ningun abogado por cera un caminda na Aruba. Ta gobierno a duna instruccion na DOW pa cera e caminda.
• mester a cera e caminda riba orden di hues: no ta existi orden di hues
• nos ta trahando riba solucion: no ta berdad, a warda 50 dia despues cu e caso a cuminsa, y cu tour operators a core tras di gobierno sin resultado, pa papia cu tour operators un biaha, despues di hopi presion
• ley di ROPV ta obliga pa cera e caminda: no ta berdad, riba e mapa di ROPV e camindanan ta pinta
• gobierno anterior a dicidi cu e sector aki mester stop di existi na 2030: no ta berdad, al contrario tur decision di gobierno anterior ta pa e sector aki por funciona duradero y structural
E posicion di partido MEP ta cu mester bin un balans den dialogo. Esey ta locual e gobiernonan di MEP a entama. E gobierno nobo mester a finalisa e proceso, pero a scohe pa no haci nada, te awor cu e situacion a escala. Aruba mester di un gobierno cu curashi, vision y determinacion
