Den conferencia di prensa semanal di MEP, lider di MEP Evelyn Wever-Croes a urgi atencion pa e crisis cu tin na e planta di purificacion di awa na Bubali, AWSS. Despues di 550 dia di gobierno AVP-Futuro, e crisis rond di e planta di purificacion di awa na Bubali Aruba Wastewater Sustainable Solutions (AWSS) ta bira cada biaha mas urgente.
E planta na Bubali ta 54 aña bieu. El’a wordo construi na 1972 pa procesa 4.500 m³ di awa sushi pa dia. Awe, e ta procesa entre 8.000 y 9.000 m³ pa dia, y ta logico cu e planta no por cu esaki mas.
E planta a wordo privatisa hustamente pa por haya acceso na financiamento pa haci e mantencion urgente, elimina e problema di mal holo y, principalmente, pa construi un planta completamente nobo, cu capacidad pa e necesidad actual di Aruba.
Pa financia esaki, AWSS a haya e derecho pa cobra US$20 di cada turista cu ta drenta Aruba. Aña pasa, Aruba a ricibi aproximadamente 1.5 miyon turista. Esaki ta representa mas o menos US$30 miyon, pues mas di 50 miyon florin.
Mi pregunta ta simpel: UNDA E PLACA A BAI?
550 dia despues, e problema di mal holo ainda ta presente. Y e planta nobo, cu mester tabata e solucion structural, segun e ultimo informacion duna den Parlamento, ni sikiera ta den e planning mas.
Entretanto, e gobierno a aumenta considerablemente e cantidad di personal den AWSS, mientras cu e trabou di e compania no a crece na e mesun proporcion.
E crisis aki no ta solamente un problema di infrastructura y medio ambiente. E ta un crisis pa salud publico, pasobra e calidad di e awa cu ta bay pa e plas y pa lama no ta cumpli cu e normanan. E ta tambe un riesgo pa nos turismo y nos economia, pasobra si e planta faya, un riesgo cu tabata existi desde e periodo cu nos tabata den gobierno, e impacto riba Aruba ta serio.
Mi a reuni cu varios stakeholders cu ta profundamente preocupa y cu ta pidi accion.
E solucion ta cla: gobierno mester sigui cu urgencia cu e plan pa un planta di tratamento completamente nobo, moderno y cu capacidad pa e Aruba di awe y di mayan. Esey ta e solucion.
Desde Parlamento, MEP lo sigui haci su trabou: haciendo pregunta, pidiendo reunion, buscando informacion y denunciando unda ta necesario.
Nos lo sigui exigi transparencia riba e mas di 50 miyon florin cu AWSS ta recauda tur aña y, mas importante ainda, nos lo sigui pusha pa e solucion cu Aruba tin mester.
Aruba no por keda paga y sufri. E tempo pa accion y resultado ta awor.
