Parlamentario di Fraccion di MEP, drs. Shailiny Tromp-Lee, a entrega un serie di pregunta oficial na Prome Minister Mike Eman relaciona cu e actividadnan semanal conoci como “Accion den Bario”.
E preguntanan ta enfoca riba e base legal y administrativo di e actividadnan, e criterio pa selecciona bario y casnan, e uzo di personal y recurso di Gobierno, e gastonan involucra y e manera con ta garantisa trato igual pa ciudadano.Tromp-Lee ta considera importante cu un iniciativa publico di e tipo aki ta wordo ehecuta di manera transparente, verificabel y cu criterio obhetivo, precisamente pasobra ta trata di recurso publico y personal di Pais Aruba.
Criterio obhetivo y oportunidad igual pa ciudadano
Den e ultimo lunanan, ta wordo observa cu tur diahuebs Prome Minister, hunto cu personal y vehiculonan di diferente servicio gubernamental, manera DOW, Serlimar y Bureau City Inspector, ta bishita diferente bario y casnan particular pa realisa trabounan di limpiesa, recoleccion di sushi y verfmento.
Un bario limpi y bon manteni ta claramente den interes di e comunidad. Sinembargo, e pregunta central ta: riba cua base ta determina cua bario y cua cas ta wordo inclui den e actividadnan aki?
“Ora recurso publico ta wordo mobilisa pa presta servicio na casnan of barionan particular, pueblo tin derecho pa sa cua ta e criterio, ken ta tuma e decision y con un ciudadano cu tin e mesun necesidad por solicita e servicio,” Tromp-Lee a declara. Segun e parlamentario, e ausencia di un procedemento publico y claramente documenta por crea un riesgo di trato desigual of faboritismo, si no tin criterio obhetivo y verificabel pa determina ken ta beneficia di e actividadnan.
Uzo di recurso di Estado
Un otro punto central den e pregunta ta e mobilisacion di personal, material, vehiculonan y otro recurso gubernamental pa e actividadnan semanal.Tromp-Lee ta pidi claridad tocante e impacto di e actividadnan aki riba e trabounan regular di e departamentonan involucra.
“Pueblo mester por sa cuanto oranan di personal publico ta wordo dedica na e actividadnan aki, cuanto ta costa, cua vehiculonan y material ta wordo uza y for di cua presupuesto e gastonan ta wordo cubri. Transparencia financiero y administrativo no ta opcional ora ta uza recurso di pueblo,” e parlamentario a expresa.
Separacion entre actividad gubernamental y actividad politico-partidista
Tromp-Lee ta cuestiona tambe e participacion di parlamentarionan di e fraccion di AVP den e actividadnan.E participacion aki, combina cu e presencia di e Prome Minister y recurso di Gobierno, ta haci necesario pa aclara con ta separa actividad gubernamental di actividad politico-partidista, pa evita cu recurso publico of personal di Pais Aruba ta wordo uza pa promocion politico.
“Mi no ta cuestiona cu un gobierno por tin iniciativa pa mehora barionan. Mi ta cuestiona e falta di claridad tocante e criterio, e procedemento, e costo y e separacion di rol. Si ta un programa gubernamental, e mester por wordo demonstra cu e ta un programa gubernamental, cu regla cla, criterio obhetivo y oportunidad igual,” Tromp-Lee a enfatisa.
Pregunta pa pidi pa transparencia y responsabilisacion
Den su carta oficial, Tromp-Lee a pidi entre otro claridad tocante:
- Criterio y seleccion: Cua ta e criterio obhetivo pa selecciona bario y casnan, y unda e decisionnan aki ta wordo documenta?
- Igualdad di acceso: Cua ta e posibilidad pa un ciudadano cu no tin acceso directo na e Prome Minister of na un miembro di Gobierno solicita e mesun tipo di servicio?
- Base legal: Cua ta e base legal y administrativo pa e actividadnan?
- Uzo di personal: Cuanto empleado publico ta wordo mobilisa y cuanto ora di trabou ta wordo dedica na e actividadnan?
- Costo total: Cuanto e actividadnan a costa Pais Aruba te cu awe, incluyendo oranan regular y overwerk, huur, combustible, verf, material y otro gastonan?
- Presupuesto: Den cua partida presupuestario e gastonan aki ta wordo registra?
- Contratacion y destaho: Pa e contratonan, servicionan y compranan involucra, cua reglanan di contratacion publico y aanbesteding ta aplicabel y ta wordo aplica?
- Separacion di rol: Cua medida a wordo tuma pa garantisa cu recurso, personal y infrastructura gubernamental no ta wordo uza pa beneficio politico-partidista?
- Documentacion: Unda e decisionnan, gastonan, ordennan di trabou y autorisacionnan relaciona cu e actividadnan ta wordo registra y por wordo consulta?
“Transparencia ta mas cu un video of un potret”
Transparencia no ta solamente mustra den video of potret loke ta wordo haci. Transparencia ta mustra pa ken, riba cua base, cu cua criterio, cu cua autorisacion y cu cuanto recurso di pueblo e ta wordo haci.
Como parlamentario di oposicion, mi ta haci e pregunta aki precisamente pa haya claridad. Pueblo tin derecho pa conoce e contestanan y pa sa cu recurso publico ta wordo maneha cu responsabilidad, transparencia y trato igual,” Shailiny Tromp-Lee a conclui.
