Oranjestad, 12 di april 2025 – Un tragedia a marca e dia di diabierna atardi na beach di Arashi, unda dos turista femenino hulandes a haya nan morto despues di un snorkeling cu un final tristo. E biento fuerte y e coriente peligroso di lama a hunga un rol mortal, cual un di nan fayece na sitio y e otro, despues di un lucha y reanimacion, tambe a fayece.
Segun testigo ocular, un persona cu un rubberboat a mira e damanan ta zwaai for di leu di costa y a bati alarma. Polis y ambulance a yega rapido, pero ya tabata laat pa e prome victima, un señora di 53 aña, cu no a logra sobrevivi. E di dos dama, su ruman muher, a wordo reanima na e beach y transporta pa hospital, pero lamentablemente e tambe a fayece diabierna anochi.
E famia cu ta na Aruba pa bishita un yiu cu ta haci stage aki, a keda devasta. Autoridadnan ta investigando e causa exacto di e incidente, pero ta cla cu e condicionnan di lama y e posibel falta di alerta riba e peligro a contribui na e desgracia.
Polis a elogia e esfuerso di su agentenan y e equipo di emergencia cu a lucha pa salba e damanan. “Nos ta manda nos mas sincero condolencia na e famia,” un vocero di Cuerpo Policial a declara.
E incidente ta laga nos reflecciona di e importancia di sea prudente cu naturalesa y di semper snorkel cu precaucion, preferiblemente den area supervisa.
E victimanan ta: Dina Brouwer – 53 aña y Wille Hoekman di 49 aña.
Solo di Pueblo ta extende condolencia na tur famia.
