Mi tabata tin reservacion si skirbi of no mirando cu mi ta pafo di politica y segundo Aruba ta keda un pais binario. Independiente di bo afiliacion politico, si bo critica MEP bo mester ta AVP y si bo critica AVP bo mester ta MEP. E rivalidad ta asina structura den nos cultura, cu kier of no kier bo ta ser marca cu uno of e otro. Lagami cuminsa na bisa cu entre un escogencia di AVP-Futuro of MEP-RAIZ, despues di sinta 3,5 aΓ±a den parlamento, mi ta opta pa e prome sin duda. Sinembargo, populismo no ta un modelo di desaroyo, e ta un tactica di campaΓ±a (probablemente no uno admirabel).
Mi ta cuminsa cu algun experencia personal cu departamento cu ta resorta bao Ministerio di Finansas. Na juli 2025 nos a likida ACCION 21 y Stichting Fractiemedewerkers ACCION 21, e segundo ta e structura cu tur partido den parlamento mester establece pa ricibi ondersteuning. Na momento cu e publicacion a sali pa di dos biaha den landscourant mi a email tur contacto cu mi tabata tin na DIMP pa nan saca e vereniging y stichting di nan sistema pa no mester yena nihil tur luna y verzamelloonstaat tur aΓ±a. Mi no a haya ningun contesta, dus mi a cuminsa yama DIMP, kisas despues di 10 yamada porfin mi a haya un hende na telefon cu a bisami no, no por haci esey pa email mester trece e documentonan den persona.
Mi a bay den persona cu e papelnan di KvK, publicacion di landscourant y respectivo persoons nr., mi a haya bon servicio y nan a stamp e documentonan y conseha mi saca potret como prueba cu nan a ser entrega. Despues di un tempo cortico mi a haya email di un persona na DIMP cu e documentonan a wordo manda pa e persona/departamento fout y nan a brinda mi un email di e persona encarga. Curiosamente esaki ta un persona cu mi a email caba prome cu mi a bay entrega e documentonan den persona.
Awor mi mester sinta paga un administratie kantoor sigui declara nihil pa evita cu bin boet y despues mester manda bezwaar pa un entidad cu a wordo sera aΓ±a pasa. Una bes publica den landscourant pa ley e compania no ta existi mas, esey ta conta no unicamente pa ciudadano pero tambe departamento di gobierno aunke nan no tin cuenta cu ley.
Algun aΓ±a pasa DIMP tabata tin 167.000 bezwaar pendiente, nan manera di opera ta sigura cu nan nunca lo actualisa e achterstand. Con dificil ta laga un hurista di DIMP repasa publicacion di landscourant y avisa e departamento concerni cu e entidadnan menciona no ta existi mas y por ser saca di sistema pa evita acumulacion di mas bezwaar? Ta ridiciculo cu ciudadano mester keda declara nihil pa evita boet ficticioso y despues bay den bezwaar pa algo asina simpel cu facilmente por wordo remedia.
Otro ehempel, na 2022 DIMP a lubida di desconta impuesto paga den exterior di mi aangifte. Aunke mi a papia cu e departamento na telefon y ser sigura cu nan ta casi cla y no lo mester entrega un rappel, un aΓ±a a pasa sin resolucion. Consecuentemente mi mester core tras di un accountant pa entrega un rappel, aunke nan ta bisa esey no lo yuda cu nada, sinembargo esey ta instruccion den e carta ricibi di DIMP. Imagina bo, si DIMP no trata bo bezwaar den un aΓ±a ta obligacion di e ciudadano of negoshi sigui entrega rappel tur aΓ±a pasobra DIMP no por haci su trabao den un termino debido, ki locura!!! Pa colmo esaki ta e mesun departamento encarga cu certifica ciudadano riba nan comportacion fiscal – ban nan ta serio, nan mes no lo pasa.
Departamentonan di gobierno no ta usa βkey performance indicatorsβ pa di un forma structura purba mehora servicio na ciudadano. Nan ta simplemente drief den un aparato gubernamental desorganisa, ineficiente y cu ta perhudica desaroyo di nos pais. Ministernan ta bay bin, directornan tin biaha ta cambia, ambtenaarnan cu no ta funciona ta wordo hala pa otro departamento y despues nos ta keda asombra cu na Aruba nos ta paga nivel di belasting di prome mundo pero haya servicio publico di tercer mundo.
Mi a lesa cu Minister di Finansas a laga pidi un rapport con pa desaroya industria di Fintech, pero sin drecha e departamento mas importante bao dje, e lo ta envano. Bo ta imagina industria di Fintech mester yama DIMP 10 biaha prome nan haya contesta na telefon? Pa despues wordo instrui cu tal servicio no por ser haci digital, mester trece e documentonan den persona pa despues e documentonan pasa di un departamento pa otro sin nunca yega un resolucion? Si no drecha e fundeshi di sector publico, plannan pa crecemento of diversificacion lo keda riba papel β na 2026 mester por miho.
