Mi a tuma nota di un comunicado di Gabinete Wever-Croes lamentando mi comentarionan riba Parlamento Hubenil. Na prome luga usa plataforma di gobierno di Aruba pa comunica atake politico ta un forma di censura y otro ehempel di corupcion di partido MEP. Parlamento Hubenil su rol ta pa desaroya liderazgo den hobennan y sigur no liderazgo a base di gañamento, manipulacion y corupcion manera sra. Evelyn Wever-Croes ta desplega.
Pa Parlamento Hubenil sigui florece e mester keda liber di politica y mi ta compronde cu su statuutnan original tabata percura pa esey. Boso ta kere cu partido MEP por respeta un instituto liber di politica of te hasta esey nan lo purba corumpi pa probecho politico? Esnan cu a pensa cu nan lo purba corumpi te hasta Parlamento Hubenil cu influencia politico manera nan a haci cu casi tur instituto di nos pais ta corecto. No menos cu dos fractiemedewerker di partido MEP awor ta forma parti di bestuur di Parlamento Hubenil.
Pero Evelyn Wever-Croes su gañamento to caba eynan, ela declara den su comunicado cu un candidato di ACCION21 tabata ataca gobierno mientras forma parti di Parlamento Hubenil. Mentira, e ex-candidato a tuma su retiro fe Parlamento Hubenil tempo ela join HAC, e hala hubenil di AVP, hopi prome cu ela drenta ACCION21. Custumber ta cu ora un miembro di Parlamento Hubenil kier asocia na un partido politico, nan ta tuma nan retiro, contrario na loke ta sosodiendo awor aki.
Mi ta ripara un tendencia si, cada biaha Evelyn Wever-Croes sali pa defende un persona of organisacion ta pa hendenan cu a dobla na fabor di partido MEP, sea ta griffier di Staten of director di DWJZ. ACCION21 semper lo denuncia mal uso di un funcion publico pa haci politica. Un empleado publico su preferencia politico NO por afecta su decisionnan profesional. Nos institutonan ta depende riba nan imparcialidad pa funciona, esey ta linea recta contra ideologia di partido MEP cu kier corumpi tur cos pa probecho politico.
Atrobe mi ta haci un apelacion na Parlamento Hubenil mantene boso independencia di politica pa nos hobennan sigui haya oportunidad pa siña liderazgo. Ningun directiva temporal tin e autoridad pa deshaci di 20 aña di precedencia y laga partidonan saca probecho di Parlamento Hubenil.
Na Sra. Wever-Croes, sea un ehempel di honestidad pa nos futuro lidernan. Henter Aruba a scucha mi palabranan durante e debate nacional, ta pa salvaguardia Parlamento Hubenil pa futuro mi ta insisti pa politica no infiltra, sea ta pa partido MEP of partido FUTURO. Probecho politico nunca por bin riba oportunidad pa nos hobennan adkiri liderazgo den un instituto berdaderamente imparcial y liber di influencia politico. Purba gana eleccion no ta tur cos, un miho ehempel di liderazgo ta para pa honestidad, asumi responsabilidad y no manipula a base di mentira. Nos hobennan merece un Minister President cu ta duna miho ehempel aunke den su ultimo dianan.
