Diadomingo ultimo Minister Endy Croes tabata presente na mini veld di Compleho Deportivo Franklyn Bareño en conexion cu final di Copa Aruba Bank Youth 5 vs 5 y Open Damas den deporte di futbol. E final den cada categoria a cuminsa for di oranan tempran di mainta. E publico y fanaticada por a disfruta di tremendo y excitante weganan di futbol. Den Youth Estrella ta gana Dakota cu e score di 9 -1 y ta logra di tercer luga y ekipo di Dakota di cuater luga di e campeonato. Mientras Britannia Damas ta logra e titulo di campeon ganando RCA cu e score final di 3-0. RCA a logra sub- campeon y di dos puesto di Copa Aruba Bank Youth Damas 5 vs 5.
A reconoce esnan cu e sobresali durante e campeonato aki. Esnan cu a haya premio individual ta Rookie Player – Sharrienne Vrolijk di Dakota, Ellen de Jong di RCA top score cu 17 gol y MVP di e torneo Youth, Wendylaine Angela di Estrella.
Den oranan di atardi e torneo a continua unda cu Estrella ta gana La Fama y keda na di tres luga den e Copa Aruba Bank Open Damas y ta conkista medaya di brons. La Fama a keda na di cuater luga. RCA ta derota Britannia 4-1 den e gran final di Open Damas y ta titula campeon y Britannia ta sub-campeon y a logra e segundo puesto.
E Madatario di Deporte a felicita e ekiponan ganado. Alabes a gradici directiva AVB como tambe Aruba Bank kende a patrocina e torneo y tur cu a contribui pa haci e campeonato di futbol femenino Youth & Open Damas posibel y exitoso. Despues a bay over na entrega di e premionan na e respectivo ekiponan di RCA y Britannia como tambe na esnan cu a sobresali individualmente. Minister di Deporte, Endy Croes como tambe representante di Aruba Bank, Sra. Gina Habibe den presencia di e directiva di AVB a haci entrega di e copanan di campeon y di dos luga na RCA y Britannia. Masha pabien na e ekiponan cu a participa y na e ganadonan!.
