ORANJESTAD: Diabierna ultimo, na Faro Blanco Restaurant a tuma luga un recepcion ‘Post PhD Toast’ pa Rosabelle Illes. E tabata un ocacion hopi emocionante pa tur presente. Prome Minister Evelyn Wever-Croes y Minister di Enseñansa & Deporte Endy Croes tawata presente y a presenta discursonan cu bunita palabaranan bon escohi pa felicita y desea Dr. Illes tur clase di exito den futuro.
Den e discurso Minister Endy Croes a expresa cu p’e ta un honor pa dirigi palabra den calidad como Minister di Enseñansa y Deporte, pasobra no ta tur dia nos ta haña e oportunidad pa celebra un logro manera esun di Dr. Rosabelle Illes. Ta un honor pa ta parti di e celebracion di exito di un yiu di tera cu a completa cu exito, un investigacion cientifico pa obtene su doctorado.
E mandatario di Enseñansa a sigui bisa; pa por hiba e discurso di awe nochi, no tabata facil, pasobra mi tambe mester a haci un ‘research’, pues un investigacion chikito pa haña sa un tiki mas di e trayectoria di Dr. Illes. Ora mi a caba cu e investigacion aki, keremi, mi por sigura boso cu mi no ta cla pa inica e trayecto pa obtene mi propio titulo di doctorado. Pues mi respet pa Dr Illes. Sinembargo, mi a identifica algun aspecto cu a hala mi atencion unda den mi opinion ta destaca den e carera di Dr. Rosabelle Illes y permiti mi comparti algun di nan:
Di loke mi a lesa, scucha y investiga, mi a conclui cu Rosabelle na edad hoben a descubri su talento, por lo menos un di nan; uno sumamente interesante y bunita. Rosabelle tin un curiosidad y un energia sin limite pa saca inspiracion for di circunstancianan, incluso di su propio introspeccion pa skirbi storianan cortico y poema, pero principalmente den nos dushi idioma Papiamento. E ta haci esaki na un forma magnifico y su talento a haya elogio y wordo reconoci internacionalmente. Rosabelle a wordo invita pa participa, entre otro, na e proyecto “Living Anthology of the World’s Poets”na Turkia. Eynan e la participa cu su poema “No Cay”, pasobra e ta kere cu e uso di Papiamento den e piesa aki ta un representacion bunita di e ritmo di nos idioma. Rosabelle a participa tambe na otro eventonan similar na Hulanda y Colombia. Na nivel local, Rosabelle su talento, pasion y amor pa nos idioma ta wordo reconoci continuamente. Ora nos bishita centro di nos ciudad, nos ta wak su potret riba posternan grandi pa duna promocion y pa invita nos bishitantenan pa disfruta di nos atraccionnan y ta motivanan pa descurbi nos patrimonio cultural.
Frecuentemente nos ta topa Rosabelle den eventonan den cual e ta declama su poemanan y tambe nos ta disfruta con e ta eherce e funcion di maestro di ceremonia na un forma magistral. Tambe Rosabelle ta wordo encarga cu proyectonan pa promove nos producto y servicionan local. Rosabelle a skirbi un storia di ‘Curasonchi’ pa ilustra con valioso un curason chikito ta realmente den un mundo grandi. Esaki ta algo sumamente bunita!
Mi a lesa un reconocimento cu e la duna su señora mama, Sra. Betty Werleman, un par di aña pasa. E la skirbi cu nunca e lo encontra un persona cu ta apoye miho manera su mama. Su mama ta su fan di mas grandi, ta dune apoyo incondicional, ta kere den dje y a siñe pa kere den su mes. Rosabelle ta apoya otro artista local tambe, door di skirbi poema cu nan ta usa den nan composicionnan. E ta usa su talento pa creativamente, inspira tur hende rond di dje, su famia, amigo, colega, su studiantenan y nos comunidad general.
Den un cuento Rosabelle a yega di skirbi: “Con maravilloso lo ta pa conoce cada alma”. E la wordo inspira pa un di su propio poemanan cu ta hiba como titulo: “Mi no por conoce mi mes, pasobra mi no conoce tur otro hende’.
A base di mi investigacion cu mi a hasi pa e discurso di awe nochi, mi por a conclui tambe cu su trabao y logronan di un manera, ta describi e intensidad y beyesa di su alma.
Dr. Illes, mi ta imagina cu awe, bo famia, amigonan y tur otro cu ta rond di bo, mester por ta sinti extremadamente feliz y orguyoso di ta aki pa celebra bo logro. Gobierno di Aruba, y particularmente nos Ministerio di Enseñansa y Deporte ta expresa su agradecimiento na tur esnan, bo famia, amistad, coleganan y e comunidad academico cu a apoyabo pa enfrenta tur e retonan cu por a aprace bo dilanti pa bo por a logra bo meta.
Nos tin e honor di por comparti nan alegria y tambe bo propio alegria, awe nochi.
E titulo cu bo ta carga awor, ta resultado di bo estudio y e investigacion cientifico cu bo a conduci. Como titular di un doctorado cu bo a obtene na un instituto Hulandes di bon reputacion y internacionalmente reconoci, ta un reconcocimento oficial cu bo ta capaz pa sigui eherce bo trabao como investigador cientifico, na un forma independiente y cu disciplina. E titulo cu bo a obtene, sin duda ta sirbi como un fundeshi solido y mi ta asumi cu e ta un fuente di confianza cu lo dunabo apoyo pa por supera cual kier desafio. Mi ta convenci cu e fundeshi cu bo a contstrui den bo campo di investigacion, ta habri caminda pa bo por cana y sigui briya cu e luz briyante cu bo tin.
Mi ta convenci cu bo lo ta exitoso den bo carera, pasobra, lagami recorda boso tur un biaha mas;
‘segun mi investigacion cu mi a haci pa mi por ta para dilanti di boso awe nochi, Rosabelle tabata hasi esaki desde edad hoben caba.’ Experiencia e tin na cantidad!
Concluyendo, mi tin e conviccion sincero, den mi calidad como Minister di Enseñansa y Deporte di e pais bunita aki cu yama Aruba, cu bo lo stima e carera nobo aki y bo lo celebra mucho mas logro y asina duna nos tur aki presente mas rason pa celebra esakinan un biaha mas cu bo den futuro. Mi ta sinti mi honra y feliz pa por ta para akinan pa comparti e momento aki cu bo Dr. Illes, cu bo famia, amigo y colegnan. Gobierno di Aruba ta orguyoso di bo! Di curason masha Masha Pabien! Danki
