Diabierna 13 di September, Minister di Finansa y su ekipo di finansa a reuni cu e Colegio di Supervision Financiero CAFT e biaha aki den su constelacion cu ta contene tambe e miembro nobo pa Aruba señor Marion Agunbero. Minister di Finansa a remarca cu na un base regular ta reuni cu CAFT pa asina informa e colegio entre otro kico ta e trabounan cu ta wordo haci pa mehora e maheno financiero di pais Aruba.
Un punto di agenda hopi importante cu a wordo trata ta e proyectonan en conexion cu e Landspakket, tema A, di cual cu ta contene un cantidad di accion cu ta wordo tuma pa e mehoracion di finansa publico entre otro introduccion di un ‘Three lines of defense’ pa asina por mehora e parti di administracion financiero di pais Aruba.
Tambe a descuti riba e risiconan pa loke ta bira e trabounan cu ta wordo haci pa e ‘deelneming en participatie beleid’ pa midi e risiconan di e NV-nan di Gobierno pa cu presupuesto di pais Aruba.
Trabounan grandi cu ta wordo haci di cual tambe e ultimo aki tin di haber cu e rapport cu recientemente Algemene Rekenkamer Aruba a trece dilanti di cual preocupacionnan ya caba a haya e atencion debido y a cuminsa traha riba nan adelanta den cuadro di e landspakket y e mehoracionnan di e parti di e maneho financiero di pais Aruba.
Pa locual ta trata e supervision di maneho financiero, a informa CAFT tambe riba e trabounan pa e nota di fin di aña di 2024 pa finalisa esaki pronto pa cuminsa e trayecto pa haya e conseho entre otro di CAFT y Raad van Advies pa despues por entrega esaki ainda na Parlamento pa su tratamento prome cu fin di aña.
Den esaki tambe ta importante pa menciona cu CAFT tabata tin palabranan di elogio pa mira con Gobierno di Aruba ta tratando cu presupuestonan di pais Aruba sigur pa e echo cu ya caba Presupuesto 2025 ta entrega na Parlamento. Ya caba nan tin un bon opinion con esaki ta hinca den otro, e bista cu e ta duna multianual pero tambe e parti cu e ta cumpli cu e normanan y sigur ta trata cu e risico mas grandi cu tin cual ta e debe di pais Aruba. Esaki CAFT tambe ta mira cu na un manera acelera ta wordo baha y pa esaki tambe CAFT tabata tin palabranan di elogio.
“E reunion hunto cu CAFT tawata uno fructifero. Nos tin un bon comunicacion y den cual nos ta trata topiconan cu nan por a mira cu transcurso di e añanan tin un mehoracion, un adelanto grandi pa locual ta e mehoracion di e parti di organisacion. Tambe ta refleha e resultado financiero unda ta wak e surplusnan, pero tambe un disciplina di entrega presupuesto na tempo y di tene nos mes na e normanan financiero.
Mi ta gradici e ekipo di CAFT y tambe e ekipo di profesionalnan na Aruba cu ta haci e trabounan necesario pa e mehoracion di locual ta finansa publico di nos pais”, Minister Maduro a expresa.
