Den cuadro di su participacion na High-Level Week di e Asamblea General di Nacionnan Uni na New York, Minister di Husticia mr. drs. Arthur Dowers, tabata keynote speaker durante un encuentro dedica na Inteligencia Artificial (AI); Rights, Remedies and AI Jurisprudence: Upholding Justice, Rule of Law and Human Rights in the Age of Agentic AI.
Durante su discurso, Minister Dowers a enfoca riba e desaroyo rapido di inteligencia artificial y e retonan cu esaki ta trece pa proteccion di derechonan humano. Cu sistemanan di AI cu ta bira cada bes mas avansa y autonomo, e pregunta di ken ta carga responsabilidad pa decisionnan y consecuencianan ta bira cada bes mas importante.
Minister Dowers a concentra su intervencion riba tres punto principal: aplicacion di e marconan legal existente, responsabilidad di desaroyadonan y uzadonan di AI, y transparencia.
Un di e puntonan cu Minister Dowers a subraya ta cu introduccion di tecnologia nobo no ta nifica cu leynan y derechonan existente ta perde nan balor. Derechonan humano universal y e marconan legal existente ta sigui aplicabel, tambe ora ta tuma decisionnan cu uzo di inteligencia artificial.
Den e contexto aki, e mandatario a referi na un caso di 2020 na Hulanda, caminda Corte di Den Haag a determina cu uzo di un algoritmo di gobierno pa detecta fraude den sistema di bienestar social tabata viola Convencion Europeo di Derechonan Humano. Segun Minister Dowers, e caso ta demonstra cu marconan legal existente por aplica tambe na decisionnan basa riba tecnologia.
Un parti importante di su discurso tabata dedica na responsabilidad. Minister Dowers a indica cu tanto organisacionnan publico como priva solamente mester uza tecnologia cu por tin impacto riba derechonan humano si nan por carga e responsabilidad cu ta bin cu esaki y por mitiga e riesgonan relaciona.
“If humans decide to delegate tasks to AI-systems, regardless of their autonomous capabilities, they cannot delegate responsibility.”
Tras di cada decision basa riba tecnologia tin un marco forma pa escogencianan humano. Hende ta tuma decisionnan of ta delega tareanan na sistemanan di AI. P’esey, independientemente di con autonomo un sistema por bira, responsabilidad final ta keda cerca hende y organisacionnan cu ta desaroya y uza e tecnologia.
“Organisacionnan no por sconde responsabilidad tras di tecnologia. AI por ehecuta un tarea, pero responsabilidad pa e resultado no por wordo delega na un mashin,” segun Minister Dowers.
E di tres punto central den su discurso tabata transparencia. Ora ta tuma un decision cu asistencia di AI cu por tin consecuencia legal pa un persona, e persona mester sa cu AI a hunga un rol y mester tin acceso na suficiente informacion pa por cuestiona e decision. Sin e informacion necesario, posibilidad pa busca claim legal ta perde su efectividad.
Minister Dowers a referi tambe na diferente instrumentonan internacional y regional cu ta pone e principio aki central, entre otro principionan di Nacionnan Uni tocante uzo etico di AI, Framework Convention on AI di Conseho di Europa y AI Act di Union Europeo.
Atencion special a bay tambe pa rol di sistema hudicial. Segun Minister Dowers, no ta necesario pa huesnan bira experto tecnico den inteligencia artificial, pero nan mester tin un comprension general di e tecnologia y e riesgonan cu ta bin cu ne pa nan por interpreta y aplica ley den casonan caminda AI ta hunga un rol. Intercambio di experiencia entre sistemanan hudicial ta importante pa determina si e instrumentonan existente ta suficiente of si tin necesidad di medida adicional.
Minister Dowers a conclui cu progreso tecnologico y proteccion di derechonan humano mester sigui bay man den man. Tecnologia por cambia e manera cu ta tuma decision, pero no por cambia e principio fundamental di responsabilidad.
“Algorithms and AI-systems may cause harm, but only humans can be held accountable.”
Participacion di Minister Dowers como keynote speaker ta forma parti di su programa na New York durante High-Level Week di di 81 Asamblea General di Nacionnan Uni, caminda e ta participa como parti di delegacion di Reino Hulandes.
