ORANJESTAD: Diadomingo ultimo Colegio Laura Wernet Paskel a celebra 60 aña di existencia alabes a recorda fayecimento di e gran persona sra. Laura Wernet – Paskel. Na bida sra. Wernet – Paskel tabata mama, docente, e prome politico femenino y autor cu a laga su marca y historia graba den enseñansa y comunidad di Aruba. E prome hende muhe cu a sigui su educacion na Hulanda. Presente na e ocasion special aki tabata Minister Endy Croes conhuntamente cu Prome Minister Evelyn Wever – Croes, directora di SKOA, sra. Anuesca Baly y demas invitadonan special. E mainta a cuminsa cu un bunita Santo Sacrificio di misa na Imaculada Concepcion na Santa Cruz pa gradici Dios Tata todo poderoso y pa conmemora e fecha special aki. Cu a sigui cu un ceremonia na e graf cu ponemento di krans den presencia di nos Prome Minister Evelyn Wever-Croes, Minister Endy Croes, yiunan di sra. Laura Wernet Paskel, sra. Inca y sr. Andre Wernet y famia di Colegio Laura Wernet Paskel. A clausura e mainta cu un recepcion ameno unda por a comparti y celebra e 60 aniversario di Colegio Laura Wernet Paskel.
Durante e mainta festivo a reconoce dos hubilario; sra. Milène Croes- Feliciana cu a celebra 30 aña y sra. Winifred Kaarsbaan a cumpli 25 aña den servicio di Gobierno. Palabranan di gratitud na ambos pa nan amor, cariño y e trabou cu a desplega den enseñansa di pais Aruba.
Concluyendo Minister Endy Croes ta felicita Colegio Laura Wernet Paskel cu 60 aña di existencia specialmente cabesante di scol, sra. Bernadette Figaroa – Geerman, docentenan, alumnonan, mayornan y un y tur cu a duna man durante e trayecto di e scol. Danki di curason pa educa y guia nos muchanan y pa fungi como e vehiculo cu ta brinda nos muchanan e oportunidad pa wordo educa y ser un miho persona pa nos comunidad. Masha pabien!
