ORANJESTAD: Diamars atardi na CEDE Aruba a inaugura e proyecto di Wizz U’ Cation. 

Un proyecto piloto pa alumnonan di ciclo bascio 2 MAVO unda ta duna oportunidad na 40 hoben cu e materia di wiskunde den idioma di Papiamento. E inauguracion a conta cu presencia di Minister di Enseñansa y Deporte sr. Endy Croes, director di CEDE Aruba, sr. Daniel Tecklenborg y cabesante di Filomena College, sra. Raquel Lampe.

E proyecto di Wizz U’ Cation ta lidera pa e hoben Giandra Erasmus hunto cu docente di wiskunde sra. Leandra Dijkhoff. Wiskunde ta un materia dificil y sigur den idioma Hulandes aki ta unda  lider di e proyecto Giandra a wak e necesidad di nos hobennan pa bin cu e proyecto di Wizz U’Cation y hunto cu docente Leandra a bin cu un solucion na beneficio di nos hobennan door crea e website pa asina por yuda e hobennan.  Riba e website tin video cu splicacion di e materia na Papiamento cu ta hacie mas facil pa hobennan por compronde. Tambe tin un werkblad na unda cu e hoben por practica esaki na cas hunto cu nan mayornan of den grupo.

Minister Endy Croes a cuminsa na felicita e hobennan, CEDE Aruba, boluntarionan y patrocinado cu a haci e proyecto aki posibel y exitoso. E mandatario a expresa di ta encanta e proyecto inovativo aki y sigur cu e lo yuda nos hobennan  desaroya den e materia. Como Minister di Enseñansa y Deporte nos ta sostene tipo di proyectonan asina. ‘Nos ta sinti nos mes honra cu e invitacion pa forma parti di e inauguracion di e website’, e Mandatario a expresa. Exito na tur esnan cu ta sostene e proyecto y exito na e 40 alumnonan cu lo participa den e proyecto piloto. 

LEAVE A REPLY

Please enter your comment!
Please enter your name here