Minister di Finansa, Asunto Economico y Sector Primario, mr. Geoffrey Wever, ta mira cu hopi orguyo bek riba e exito di e prome edicion di San Nicolas Food Festival, cu a tuma luga diabierna ultimo na Carnaval Village.
E festival a logra atrae un cantidad grandi di bishitantenan, cu a bin disfruta di un anochi yen di cuminda dushi, varia y tipico, den un ambiente hopi agradabel. Huntu cu e amplio seleccion di cuminda y bebida di 30 diferente vendors, bishitantenan por a disfruta di un 360° photobooth, un mixologist special cu a prepara diferente cocktailnan, pantaya grandi pa mira e weganan mundial di futbol, un mini cancha di futbol pa muchanan, un Dino Jump, y goza di musica di DJ y banda.
Pa sera e anochi cu un vibe tremendo, diferente artista local, manera Lord Lally, Casper y Master Gusto, a subi stage y a crea un ambiente unico cu hopi energia pa laga publico por disfruta te ultimo momento.
Minister Wever a expresa su gratitud na tur e vendors, voluntario, artista y bishitante cu a contribui na haci e prome edicion di e festival un exito di berdad!
“Nos meta tabata pa crea un evento caminda famianan, amigonan y bishitantenan por bini hunto y disfruta di nos cuminda y duna San Nicolas un apoyo positivo. E resultado a supera nos expectativanan y nos ta hopi contento cu e reaccion positivo cu nos a ricibi di comunidad,” asina Minister Wever a declara.
E San Nicolas Food Festival no solamente a brinda entretenimiento, pero tambe a crea un plataforma importante pa entrepreneurnan local y negoshinan presenta nan producto pa bishitante por conoce nan tambe, mientras cu e festival a fortalece e sentido di comunidad den San Nicolas.
Mirando e exito di e prome edicion, Minister Wever a expresa su deseo pa sigui desaroya e iniciativa importante aki y haci di San Nicolas Food Festival un evento recurrente cu comunidad por spera cu entusiasmo.
