SETAR ta informa su clientenan di cambionan importante cu ta afecta e servicio di Roaming na Merca. Siguiendo e trend di transicion global, e ultimo operador mericano cu ta uza e tecnologia di 2G lo shutdown esaki na augustus 2026.
Cu e shutdown completo na augustus, e transicion lo bay ful pa e tecnologia di Voice over LTE (VoLTE) over di e rednan di 4G y 5G na momento di haci yamada y manda SMS cu Roaming.
Di parti di SETAR, nos a activa e servicio di VoLTE Roaming cu T-Mobile USA. Esaki pa sigura cu nos clientenan por sigui tin acceso na e servicio pa haci yamada y manda SMS na momento di roam, hasta despues di e shutdown.
Pa e servicio di VoLTE Roaming funciona corecto na Merca, clientenan mester cambia nan SIM card pa esun mas nobo cu ta VoLTE ready y mester tin un telefon celular cu VoLTE enabled. Den ultimo añanan ya ta hopi cliente cu tin e SIM cardnan VoLTE ready y tin hopi cliente cu ta uzando e servicio di VoLTE local caba cu nan telefon celular VoLTE enabled.
SETAR ta encurasha su clientenan cu ta planea pa biaha pa Merca, particularmente durante e temporada di vakantie, pa verifica e compatibilidad di nan telefon celular y SIM card prome, si nan kier cumpra un Roaming Bundle including Voice pa Merca. Pa upgrade bo SIM card, por bishita cualkier Teleshop di SETAR.
E shutdown di e tecnologia di 2G y 3G ta forma parti di un transicion global pa tecnologianan di rednan di mobil mas avansa, esta 4G y 5G. Como resultado, cambionan similar por wordo spera pa e servicio di Roaming na otro destinacionnan tambe.
SETAR ta sigui monitor e cambionan aki di cerca y traha hunto cu otro operadornan na Merca y na otro destinacionnan pa activa VoLTE Roaming den futuro cercano.
