Curaçao Tourist Board (CTB) lo habri un village special pa fanatico na Houston durante e campeonato mundial di futbol. E asina yama ‘Blue Wave Village’ lo sirbi como un luga di encuentro p’e fanaticonan di Corsou y otro amantenan di futbol durante locual lo t’e prome participacion historico di Corsou den un Copa Mundial.
Falta net 4 dia p’e gran fiesta di futbol mundial cuminsa.
Momento historico pa Corsou
Blue Wave Village lo habri cerca di e prome partido di Corsou contra Alemania, cu lo tuma luga dia 14 di juni 2026. P’e fanaticonan cu kier sigui e partido aki online, esaki lo ta disponibel via e plataforma oficial di FIFA+ y via e canalanan di streaming di e canalnan local autorisa. Despues di e partido, e fanaticonan por bin hunto den e village pa celebra e participacion historico aki. E partido entre Hulanda y Hapon tambe lo wordo transmiti riba un pantaya grandi.
Ambiente local y fanaticada dividi na Aruba
Pa e fanaticonan local, ta bon pa keda pendiente pa e diferente establecimentonan na Aruba cu lo pasa e partidonan aki live riba nan pantayanan grandi. Tin varios luga na Aruba, sea restaurant grandi of chikito y hasta hotelnan, cu lo concentra riba e transmisionnan di tanto Corsou como Hulanda.
Sinembargo, e atencion special p’e partido entre Corsou y Alemania lo trece un ambiente unico. Na Aruba tin hopi, pero hopi fanatico di Alemania, lo cual ta nifica cu e pasion y e apoyonan lo ta fuertemente dividi riba e isla e dia ey, creando un rivalidad sano y un ambiente interactivo den e luga di benta di cuminda y bebida.
Cultura y turismo den spotlight
Segun director di CTB, Muryad de Bruin, e iniciativa aki ta brinda un plataforma pa presenta e cultura, musica y gastronomia di Corsou na un publico internacional. Merca ta un di e mercadonan turistico mas importante pa Corsou y ta hunga un papel crucial den e strategia di promocion di e oficina di turismo.
E village di fanatico aki ta un extension di e concepto ‘Blue Nation’ cu a wordo lansa anteriormente pa trece atencion na e participacion di Corsou den e Mundial. Medionan di comunicacion internacional y influencers tambe ta invita pa bishita e evento.
Registracion ta obligatorio
Bishitantenan mester registra anticipadamente via e website di Curaçao Tourist Board. E registracion aki ta habri unicamente pa personanan cu a cumpra un ticket pa e partidonan via Federashon Futbol Korsou (FFK) of directamente via e federacion mundial di futbol FIFA.
