Minister di Finansa, Asunto Economico y Sector Primario, Geoffrey Wever ta informa cu Gabinete AVP-FUTURO a contesta tur e 1.384 pregunta cu Parlamento di Aruba a presenta riba e Prome Presupuesto Supletorio 2026. Cu esaki Gobierno a cumpli cu un paso importante den e proceso di tratamento di e prome cambio di Presupuesto 2026 y actualmente ta wardando riba un fecha pa Parlamento trata e presupuesto supletorio.
E Presupuesto 2026 ta den pleno ehecucion. E Prome Presupuesto Supletorio 2026 tin como meta pa haci algun ahuste necesario den e presupuesto aproba, pa asina Gobierno por continua cu e ehecucion di su maneho pa 2026. E cambionan aki ta forma parti di e proceso regular di maneho financiero di Gobierno, pa por adapta e presupuesto na e necesidadnan y desaroyonan economico actual, manteniendo e disciplina financiero y e normanan presupuestario ancra den ley.
Den cuadro di transparencia y responsabilidad, Gabinete AVP-FUTURO a dedica atencion na e 1.384 pregunta di Parlamento y a entrega contestacion riba cada un di nan. E proceso aki ta forma parti di e relacion constitucional entre Gobierno y Parlamento, den cual Parlamento ta eherce su tarea di control y Gobierno ta duna cuenta di su maneho y decisionnan financiero.
“E Presupuesto 2026 ta den pleno ehecucion y e prome cambio di presupuesto ta necesario pa nos por continua cu e maneho di Gobierno pa e aña aki. Nos a contesta tur e 1.384 pregunta di Parlamento, pasobra transparencia y responsabilidad ta forma parti integral di nos maneho financiero. Nos prioridad ta pa sigui cumpli cu e normanan ancra den ley, mantene finansa publico duradero y procura pa e beneficio di desaroyo economico yega bek na nos comunidad,” Minister Geoffrey Wever a indica.
E Prome Presupuesto Supletorio 2026 a pasa door di e diferente fasenan di e proceso legal, incluyendo e evaluacion y conseho di College Aruba Financieel Toezicht (CAft) y Raad van Advies. Gobierno a presenta su reaccion riba e consehonan como parti di e documentacion entrega na Parlamento.
Minister Wever ta enfatisa cu e maneho financiero di Gabinete AVP-FUTURO ta sigui basa riba disciplina presupuestario, transparencia y responsabilidad. E meta primordial ta pa mantene finansa publico duradero, cumpli cu e ley di supervision y crea e espacio necesario pa Gobierno por continua cu ehecuccion su prioridadnan na beneficio di Pais Aruba.
Cu tur pregunta di Parlamento contesta, Gobierno ta awor na espera di e fecha pa tratamento di e Prome Presupuesto Supletorio 2026 den Parlamento di Aruba.
