Durante un rueda di prensa diabierna, Minister di Finansa, Asunto Economico y Sector primario mr, Geoffrey Wever a anuncia, cu gran entusiasmo, e prome edicion di San Nicolas Food Festival.
San Nicolas Food Festival lo tuma luga diabierna, 3 di Juli 2026, for di 6:00 PM te 12:00 AM na Carnival Village. E ta e resultado di con un comunidad, un gobierno y un districto por traha hunto pa crea un experiencia culinario cultural y economico impactante.
San Nicolas tin un identidad culinario cu ta unico den henter Caribe. For di e dianan di Lago Refinery, e districto a bira cas di trahadornan y famianan for di hopi diferente paisnan den region. Cu tempo, e comunidad a crea un patrimonio culinario cu no por wordo encontra na ningun otro luga na Aruba. Johnny cake, roti, oxtail, pisca hasa, moro, carne mechada, griyo, sopinan, pastry local, juice natural y cushina di China y Japon. Cada plato ta conta e historia di un pueblo di San Nicolas.
Minister Wever ta enfatisa cu e festival ta un motor economico real pa San Nicolas. 29 empresario a confirma nan presencia: 20 restaurant y luganan di take-away y 9 vendors di cuminda local. Adicionalmente, 8 participante ainda ta pendiente di confirmacion. Esaki ta refleha e entusiasmo genuino cu tin den e sector comercial di San Nicolas pa participa den e crecemento di nan propio districto.
E evento ta diseña pa tur hende. Residente, turista, famia, mayor y mucha lo haya un anochi hopi ameno pa bini hunto y comparti tempo cu otro. Lo tin un variedad amplio di cuminda y bebida, suficiente lugar pa sinta y disfruta, y musica en bibo durante henter e anochi. Pa muchanan lo tin un Kids Corner cu Dino Jump gratis y otro actividadnan recreativo, asina cada miembro di e famia tin algo pa disfruta.
E San Nicolas Food Festival ta conecta directamente cu e esfuerso di aporta na stimulacion economico y revitalisacion di San Nicolas . Como Cultural Heritage City di Aruba, San Nicolas merece atencion, inversion y orguyo nacional. E festival ta demonstra un bes mas, cu San Nicolas no solamente tin un pasado culturalmente rico, pero cu San Nicolas tin un futuro prometedor.
“E San Nicolas Food Festival ta un ehempel di con nos por crea oportunidad economico pa nos empresarionan local, mientras cu nos ta celebra e herencia multicultural cu ta haci San Nicolas unico. Nos kier pa henter Aruba y nos bishitantenan por bini hunto y experiencia cu San Nicolas no ta solamente un lugar pa bishita, sino ta un lugar pa biba experencia, pa conoce cultura y pa disfruta di un di e oferta culinario diversifica,” Minister Geoffrey Wever a comenta.
San Nicolas Food Festival ta tuma lugar diabierna, 3 di Juli 2026, na Carnival Village, San Nicolas, for di 6:00 PM te 12:00 AM. Entrada ta completamente gratis!
