Dialuna atardi dia 24 di augustus 2026, Minister di Finansa, Asunto Economico y Sector Primario, Geoffrey Wever, a firma un protocol di cooperacion entre Pais Aruba y Aruba Fair Trade Authority (AFTA), representa pa drs. F.R. Sint Jago. Cu e acuerdo aki Gobierno ta crea un structura mas fuerte, transparente y eficiente pa proteccion di consumidor y pa un funcionamento mas ordena di mercado Arubano.
E firmamento di e protocol ta un siguiente paso concreto den implementacion di e Landsverordening bestuursrechtelijke handhaving consumentenbescherming, cu a drenta parcialmente na vigor dia 15 di maart 2026. E ley ta duna AFTA responsabilidad pa supervision di cumplimento di normanan legal den cuadro di proteccion colectivo di consumidor, mientras cu Departamento di Asunto Economico, Comercio y Industria ( DEACI) ta encarga cu tratamento di kehonan individual, registracion di e kehonan y brinda informacion, conseho huridico y mediacion caminda ta necesario.
Cu e protocol nobo, ambos instancia ta establece acuerdonan claro riba intercambio di informacion, coordinacion di maneho y supervision, alineacion di procesonan y proteccion di informacion confidencial. Esaki ta crea un cadena di proteccion mas completo: for di e consumidor individual cu presenta un keho, te na supervision mas amplio ora tin indicacion cu un problema ta afecta un grupo di consumidornan.
“Un economia fuerte no ta solamente un economia cu ta crece. Mester tin confiansa, reglanan cla y institucionnan cu ta funciona. Consumidor mester conoce su derechonan, mester tin acceso na informacion corecto y mester sa unda acudi ora algo no ta bay manera mester ta. Cu e acuerdo aki nos ta pone e responsabilidadnan cla y ta conecta e instancianan cu mester tuma accion. Esaki ta bon gobernacion y esaki ta manera nos ta fortalece economia,” Minister Wever a indica.
Un elemento importante den e cooperacion ta e Consuloket, e loket digital pa consumidor. AFTA ta responsabel pa financiamento, contenido, maneho y mantencion di e loket, mientras cu DEACI ta encarga cu e sistema pa registra y procesa e notificacionnan di consumidor cu drenta via Consuloket. E sistemanan lo wordo alinea pa ambos instancia por dispone di informacion relevante pa cumpli cu nan responsabilidadnan di forma eficiente.
E forma di traha aki ta cuadra directamente cu e direccion di Programa di Gobernacion AVP-FUTURO 2025-2028, caminda fortalecemento di poder di compra, estimulo di actividad den sector priva, aumento di bienestar y prosperidad y modernisacion di Gobierno ta prioridadnan importante. Digitalisacion y un servicio publico mas eficiente, transparente y orienta riba e ciudadano ta forma parti di e mesun direccion.
Segun Minister Wever, proteccion di consumidor mester wordo mira como un parti integral di maneho economico. Un mercado caminda consumidor ta informa y proteha, y caminda empresanan conoce e reglanan cu ta aplica, ta crea mas claridad y confiansa pa tur partido. Na mes momento, registracion y intercambio di informacion ta crea e condicionnan pa Gobierno identifica problema recurrente den mercado y basa su maneho riba informacion concreto.
“Poder di compra no ta solamente un cuestion di prijs. E ta tambe un cuestion di proteccion. Un consumidor mester por tuma decision informa y mester tin un sistema cu ta funciona ora su derechonan no ta wordo respeta. E meta ta un mercado cu ta funciona miho pa consumidor y pa empresario serio cu ta cumpli cu e reglanan,” Minister Wever a subraya.
E protocol ta establece tambe un forma structural di supervision riba e cooperacion mes. Directornan di AFTA y DEACI lo reuni por lo menos cuatro biaha pa aña pa evalua ehecucion, progreso y eventual obstaculonan. Na nivel operacional, funcionarionan lo mantene contacto cu e frecuencia necesario. Ademas, e acuerdo y su ehecucion lo wordo evalua por lo menos un biaha pa aña pa determina si adaptacion ta necesario pa sigui mehora tratamento di kehonan y proteccion di consumidor.
Cu e acuerdo entre Pais Aruba y AFTA, Minister Wever ta sigui torah riba un maneho economico caminda ley no ta keda solamente riba papel, pero ta wordo traduci den structura, responsabilidad, supervision y servicio concreto pa comunidad. E meta ta un economia mas moderno, mas transparente y mas confiabel, caminda consumidor ta proteha, empresario tin claridad y Gobierno tin e instrumentonan necesario pa actua na tempo.
