Gobierno di Aruba ta sigui duna direccion na e transicion pa un pais mas sostenibel, eficiente y menos dependiente di combustibel fosil. Como parti di e proceso aki, Gobierno ta amplia electrificacion di su fleta di vehiculo, cu awor tambe vehiculonan electrico pa e ministernan, como un siguiente paso concreto den un transicion di energia cu ya ta andando den diferente instancia publico.
Como minister di Asunto Economico, minister Geoffrey Wever a duna inicio na e transicion den Gobierno. Diferente departamento y compania estatal bou di su liderazgo ya ta haciendo uso di vehiculo electrico, entre otro Directie Economische Zaken, Handel en Industrie (DEZHI), Servicio na Defensa di Consumidor (SEDECO), Centraal Bureau voor de Statistiek (CBS), Dienst Telecommunicatie Zaken (DTZ) y Post Aruba N.V. y awo tambe pa Conseho di Ministers di Aruba.
E paso aki no ta un iniciativa aisla. E ta forma parti di un proceso mas amplio pa modernisa operacion di Gobierno, reduci gasto, haci uso mas eficiente di energia y prepara Aruba pa un futuro unda sostenibilidad y independencia energetico ta ocupa un posicion cada biaha mas importante.
Gobierno su rol ta esencial den e proceso di transicion aki no solamente door di traha maneho, pero tambe door di ehecuta esaki. Electrificacion gradual di e fleta publico ta un ehempel concreto di con Gobierno mes ta implementa e cambio cu e kier stimula den comunidad. Cu esaki gobierno ta demostra su compromiso pa lidera e transicion aki. Den e cuadro aki ta cumpli tambe cu palabracionnan haci den Programa di Gobernacion AVP-FUTURO riba pagine 19, unda cu a keda acorda cu auto di trabou pa minsternan no mag di ta mas caro cu EVs y/of hybrid na balor di Afl. 70.000.
E proceso a conoce diferente fase. Despues di un consulta di mercado y un destaho publico, compania Green Wheels a wordo selecciona pa entrega e vehiculonan electrico pa e ministernan, cu excepcion di Promer Minister Eman.
E resultadonan inicial ta mustra cu e cambio no solamente tin un beneficio ambiental, pero tambe financiero. Segun dato practico di e fleta di CBS durante e prome seis lunanan, gasto di combustibel a baha cu aproximadamente 70%, di un promedio di AWG 1.500 pa AWG 405 pa luna pa cada vehiculo.
Pa Aruba, e transicion aki tin un importancia strategico. Como isla, nos pais ta altamente dependiente di combustibel fosil importa y, consecuentemente, ta vulnerabel pa fluctuacion di prijs y desaroyo internacional fuera di nos control. Cada paso pa reduci e dependencia aki ta contribui na mas stabilidad, mas eficiencia y un economia cu ta mihor prepara pa futuro.
Minister di Finansa, Asuntonan Economico y Sector Primario, Geoffrey Wever, ta enfatisa cu Gobierno tin e responsabilidad di mustra liderazgo den e proceso.
“Transicion pa sostenibilidad mester wordo converti den accion concreto. Como Gobierno, nos kier duna e ehempel y implementa e cambionan cu nos mes ta considera necesario pa futuro di Aruba. Electrificacion di nos fleta ta yuda baha gasto, reduci dependencia di combustibel fosil y crea espacio pa haci mas uzo di energia sostenibel produci localmente. Esaki ta un transicion cu nos ta dirigi paso pa paso y cu mester genera beneficio duradero pa nos pais,” Minister Wever a remarca.
E direccion aki ta wordo fortalece tambe mediante e GO Programme, un programa financia pa Union Europeo pa acelera transicion di energia den islanan. Den e programa aki Aruba ta ehecuta e proyecto “Reducing Transport-Related Carbon Emissions and Fuel Costs from the Car Fleet of the Government of Aruba.”
E proyecto, implementa pa e empresa di asesoria Aleman Energynautics, cu manehamento di proyecto di Expertise France, ta sostene Aruba den preparacion di un plan pa electrificacion completo di e fleta di Gobierno. Esaki ta inclui un maneho di compra pa vehiculonan electrico, un plan pa manejo di baterianan, desaroyo di infrastructura di carga, analisis di impacto riba e red electrico y instrumentonan di maneho pa facilita un adopcion mas amplio. E trabou ta wordo haci den colaboracion cu partnernan local, incluyendo ELMAR y DOW.
E transicion ta construi riba pasonan cu a wordo inicia anteriormente y cu Gabinete AVP-FUTURO ta continua, amplia y acelera. Asina Gobierno ta sigura continuidad den un proceso strategico cu mester fortalece Aruba riba termino largo.
Minister Wever a gradici tur partner y stakeholder cu ta contribui na e proceso. Segun e minister, e meta ta cla: Gobierno mester sigui lidera cu ehempel, crea e condicionnan necesario y sigui converti sostenibilidad for di un vision den resultado concreto pa Aruba.
