En conexion cu celebracion di Dia Internacional di Piscado, Minister di Finansa, Asunto Economico y Sector Primario, Geoffrey Wever, a bishita un grupo di piscadonan durante e torneo di pesca di Hadicurari. Cu su presencia, Minister Wever a honra e dedicacion, conocemento y perseverancia di piscadonan Arubiano y a reafirma su compromiso pa sigui fortalece pesca como parti importante di Sector Primario.
Durante e torneo aki 42 boto a registra cual ta demostra e interes grandi cu tin entre e piscadonan pa e celebracion di Dia di Piscado. Pesca ta un actividad cu durante generacionnan ta forma parti di nos tradicion y economia local. Pa Minister Wever, e reto awor ta pa crea e condicionnan necesario pa e actividad aki por sigui desaroya den un forma mas fuerte, moderno y sostenibel, mientras cu ta conserva e conocemento y experiencia cu piscadonan a pasa di generacion pa generacion.
E vision di Minister Wever pa Sector Primario ta pa fortalece su capacidad productivo y crea mas oportunidad pa esnan cu diariamente ta activo den agricultura, cria di bestia y pesca. Den e cuadro di esaki, Gobierno ta sigui traha pa modernisa Santa Rosa y fortalece e servicionan cu e institucion ta brinda na e sector. Recientemente Minister Wever como minister di Agricultura, Cria y Pesca a inicia un programa bou e nomber di Piskechi cu e meta pa siña nos muchanan pisca y tur aspecto di piscamento. Den corto tempo a entrega certificado na decenas di mucha cu e finalisa e programa y a siña pisca na baranca.
“Nos piscadonan ta carga un tradicion importante di Aruba. Nos responsabilidad ta pa no solamente honra e trabou cu nan ta haci awe, sino tambe crea e condicionnan pa un generacion nobo por mira un futuro den pesca. Un Sector Primario fuerte mester inclui un sector di pesca cu ta sostenibel, productivo y prepara pa futuro,” Minister Geoffrey Wever a expresa.
Minister Wever a felicita tur piscado na ocasion di Dia di Piscado y a gradicinan pa nan contribucion continuo na produccion local y na preservacion di un tradicion cu ta parti di identidad di Aruba.
