Durante un conferencia di prensa, Minister di Finansa, Asunto Economico y Sector Primario, mr. Geoffrey Wever, a elabora riba e resultadonan preliminario di ehecucion di presupuesto 2026 pa e periodo januari te cu september 2026. E cifranan presenta den e “Uitvoeringsrapportage kwartaal 3 2026” ta mustra un resultado financiero preliminario di Afl. 322 miyon florin pa Pais Aruba, cu ta igual na 4,0 porciento di Producto Interno Bruto (PIB). Pa e sector colectivo, Hunto cu otro entidadnan AZV, SVb, ATA, Serlimar, SEPB y Universidad di Aruba, e cifranan mustra un resultado financiero preliminario di Afl. 517 miyon florin cu ta igual na 6,4 porciento di PIB. Manera ley di supervision ta stipula, CAft a ricibi na tempo, den seis siman, e “Uitvoeringsrapportage kwartaal 3 2026”. Cifranan presenta ta cumpli cu e normanan presupuestario manera ancra den ley.

Te cu september 2026, e entradanan di Pais Aruba a alcanza Afl. 1.593 miyon florin, equivalente na 82 porciento di e total presupuesta pa henter aña. Di esaki, Afl. 578 miyon florin ta impuesto directo y Afl. 686 miyon florin ta impuesto indirecto. Compara cu e mesun periodo di 2025, entradanan di impuesto directo a aumenta cu Afl. 57 miyon florin, un crecemento di 11 porciento. Entradanan di impuesto indirecto a aumenta cu Afl. 22 miyon florin, equivalente na 3 porciento compara cu e mesun periodo di 2025. Dentro di e categoria aki, BBO/BAVP a genera Afl. 349 miyon florin, un aumento di Afl. 26 miyon florin, of 8 porciento.

DIMP ta colecta tambe primanan di SVb y AZV, e impuesto turistico pa ATA y BAZV. E entradanan conjunto di e categorianan aki a alcanza Afl. 882 miyon florin te cu e tercer kwartaal, compara cu Afl. 823 miyon florin den e mesun periodo di 2025. E crecemento di entradanan aki ta mustra e desaroyo positivo di Aruba su economia.
E gastonan di Pais Aruba te cu september 2026 ta yega un suma di Afl. 1.273 miyon florin, equivalente na 71 porciento di e presupuesto anual di Afl. 1.803 miyon florin. Gastonan di personal a suma Afl. 382 miyon florin, equivalente na 74 porciento di e presupuesto anual pa personal y 4,7 porciento di PIB. Ta premira cu of “public wage bill” yega 8,2 porciento di PIB. Cu esaki Pais Aruba ta cumpli e “personeelslastennorm” cu desde 2027, ta drenta na vigor, cu un maximo di 10 porciento di PIB.

Na final di e tercer kwartaal di 2026, e debe total di Pais Aruba tabata Afl. 4.961 miyon, equivalente na 61,4 porciento di PIB. Na final di 2025, e debe tabata Afl. 5.079 miyon, of 64,6 porciento di PIB. Esaki ta representa un reduccion di Afl. 118 miyon y un bahada di 3,2 punto porcentual den e relacion entre debe y PIB.
Te cu september 2026, Pais Aruba a paga Afl. 556 miyon na debe, equivalente na 86 porciento di suma presupuesta di Afl. 648 miyon pa henter aña. Na interes te cu september 2026 Pais Aruba a paga Afl. 184 miyon florin, cu ta 65 porciento di e suma suma presupuesta di Afl. 282 miyon florin.
Cifranan presenta den e uitvoeringsrapportage derde kwartaal 2026 ta mas cu cifra. Esaki ta ehecucion concreto di maneho di Gabinete AVP- FUTURO. E cifranan ta contene entre otro e reparatietoeslag di Afl. 450 florin extra na 22mil pensionado, structural tur luna, gastonan di personal ta refleho di e extra aumento na kaderpersoneel pa gobierno sigui mantene e profesionalnan. Desde huramentacion di Gabinete AVP-FUTURO, ta elabora ampliamente den un conferencia di prensa riba ehecucion di e maneho financiero segun minister Geoffrey Wever.
Minister Geoffrey Wever ta gradici Departamento di Finansa pa compila e cifranan den colaboracion cu DIMP, Douane, DRH, DOW y e demas entidadnan di e sector colectivo AZV, SVb, ATA, Serlimar, SEPB y Universidad di Aruba. E uitvoeringsrapportage kwartaal 3 2026 entrega na tempo na CAft, ta duna un bista di e ehecucion di presupuesto y e resultado financiero di e sector colectivo. Como parti di duna informacion, Parlamento di Aruba tambe a ricibi uitvoeringsrapportage derde kwartaal 2026





