Den e programa di Enfoke di diahuebs 10 di november, Minister di Asuntonan Economico, Comunicacion y Desaroyo Sostenibel, mr. Geoffrey Wever a duna claridad na pueblo riba e puntonan cual parlamentario Gerlien Croes a trece dilanti via prensa.
Parlamentario Gerlien Croes ta bisa cu e decision di aumento di BBO ta un mal decision cual lo bai afecta pueblo mas. Minister Wever a splica cu esaki no ta e caso mirando cu diferente estudio haci a base di peticion di Gobierno di Aruba a demostra cu un subida di e tarifa di BBO cu 1.0% lo tin un impacto di 1.4% riba inflacion compara cu e impacto di BTW riba inflacion cual ta entre 5.3% y 9.9%. Dus e subida di tarifa di BBO cu 1.0% lo tin impacto menos negativo riba inflacion cu e impacto riba inflacion door di introduccion di BTW y ta inflacion ta e manera pa midi e impacto pa comunidad. Minister Wever ta lamenta cu ta malinforma nos ciudadanonan.
Minister Wever ta informa cu dia di presentacion di e Vestigingsbeleid 2022 den Parlamento na oktober, Parlamentario Gerlien Croes a puntra Minister Wever pa por haya inzage den e documentonan di e estudionan encuanto aumento di BBO. Pa e tratamento di presupuesto 2023, Minister Wever a trece tur conseho y estudio riba e topico aki cu a ser haci pa a jega na e decision di aumento di tarifa di BBO, en bes di introduci BTW na e momento aki. E momento eynan tur parlamentario por a lesa e documentonan y por a hiba e dialogo y debate riba e contenido. No solamente pa e parti politico, pero pa informa y splica pueblo. Lamentablemente parlamentario nan di oposicion no tawata presente pa hiba e debate riba contenido.
Den e tratamento di presupuesto, riba pregunta over planes pa Oranjestad, Minister Wever a presenta un video cu ta ilustra e planes di renovacion di Oranjestad. Minister Wever ta lamenta cu en bes cu Parlamentario Gerlien Croes wak cu tin un gobierno cu ta traha riba continuidad, Parlamentario Gerlien Croes a scohe pa reacciona den prensa negativamente riba esaki y ta scohe pa bin cu critica y opinion negativo riba e proyecto Oranjestad bisando cu e proyecto ey tabata di AVP y cu Minister Wever ta kies e mesun arcitecto pa e proyecto cual tabata e arcitecto cu a traha cu AVP tambe. Minister Wever ta splica cu e proyecto di Oranjestad a wordo diseña door di Minister den sondeo cu diferente stakeholders y cu pa e parti arquitectonico Minister Wever a scohe pa traha cu e architect aki door di e conocemente y experiencia di e architect. Minister Wever a sigui splica cu si tin un proyecto bon di un gobernacion anterior, Minister Wever no tin problema pa por sigui cu e proyecto ey den bienestar di progreso di Aruba. Minister Wever ta busca pa logra quick-wins cu mayor impacto uzando menos recurso posibel paso Pais Aruba su recursonan ta limita.
Minister Wever ta lamenta cu Parlamentario Gerlien Croes como politico nobo y como persona cu ta desea di ta lider di pueblo, ta tuma e actitud aki y no ta haci uzo di e oportunidad pa mustra pueblo cu esaki ta un politica nobo y diferente y haci uzo di e oportunidad pa laga color politico un banda y para pa continuacion di maneho den bienestar di progreso di Aruba.
“Den Parlamento ta e caminda pa dialoga, debati y duna sugerencia pa mehora maneho di nos Pais. Aruba tin diferente reto pa enfrenta y mester di madurez politico. Si nos keda pensa den partido of den coalicion y oposicion nos no lo logra riba termino largo. Solamente door di traha hunto nos lo hiba Aruba padilanti” – Minister Geoffrey Wever.
