Diasabra mainta a surgi un situacion unda por a constata huma tumando control di e bisindario di dump Parkietenbos pa motibo di candela y pa anochi e candela a crece y menasa di bira un crisis nacional.

Minister Arends mesora a haci yamada na departamentonan concerni pa atende cu e candela inmediatamente y tambe a presenta na sitio pa ta na altura di con a yega na un punto unda cu e situacion a escala di e manera aki y pa coordina hunto cu e otro departamentonan riba posibel solucion. Tambe a coordina cu empresanan priva cu tin ekipo y material cu mester na momento asina.

Pa 1’or di madruga ekipo di DOW y Serlimar den cooperacion cu CTC y ATCO a logra domina e parti mas grandi. Cada 5 minuut un truck a yega cu santo pa combati e candela. Pa oranan di mainta e candela a keda grandemente domina. Minister Arends ta enfatisa cu combati e candela aki tabata un esfuerso nacional caminda sector publico y sector priva a pone man na obra pa hunto ataca un situacion hopi serio.

Na e momentonan aki no por specula ainda na e causa di e candela pero lo averigua esaki pa trece claridad y pa preveni cu esaki lo por sosode atrobe mientras ta den proceso pa cera e dump pa fin di aña.

Minister Arends ta gradici Bureau Rampenbestrijding, cu a reacciona cu rapidez no solamente riba e yamada di Minister Arends pero riba un emergencia pa Aruba henter. Tambe palabra di danki na Brandweer Aruba, Serlimar, DOW, CTC, ATCO y tur otro instancia y departamento cu a yuda atende cu e situacion lamentabel aki. 

“Dump Parkietenbos ta un crisis nacional y e candelanan aki ta urgi nos pa acelera mas ainda e proceso pa cera dump Parkietenbos y ciudadanonan di Aruba por ta sigur cu nos lo haci nos maximo esfuerso pa cu esaki,” Minister Arends ta reacciona, “den 1 aña nos a bin ta traha riba un solucion structural pa un problema cu a bin ta causa peliger na nos medio ambiente y pa e salud di nos habitantenan ya pa 70 aña caba, pero pa 31 di december 2022 nos ta bai logr’e!” Minister Arends ta termina. 

LEAVE A REPLY

Please enter your comment!
Please enter your name here