Durante e ultimo simannan di aña escolar 2025-2026, Minister di Educacion, sra. mr. Gerlien Croes a duna continuidad na su recorido pa e diferente scolnan, cu e obhetivo di intercambia idea cu e docentenan, evalua e estado di e infrastructura y mantene un comunicacion di cerca cu e alumnonan/studiantenan y e ekiponan di trabou na cada scol.
E bishitanan aki ta wordo realisa pa haci e lasonan mas fuerte entre gobierno y e sector di educacion, percurando pa e mandatario haya un imagen transparente di e realidad den e veld educativo. Recientemente, Minister Gerlien Croes a bishita Scol Preparatorio Aurora, Agnes Kleuterschool, Colegio Felipe B. Tromp, Ceque College MAVO, Scol Preparatorio Washington, Scol Basico Washington, Colegio Ora Ubao y Prinses Amalia Basisschool.
Na tur e scolnan aki, Minister Gerlien Croes a ricibi un caluroso bonbini cu hopi energia y entusiasmo, reflehando con comprometi tur hende ta cu e progreso di nos muchanan.
Durante su recorido, Minister Gerlien Croes a duna reconocemento na e esfuerso di e maestronan y e personal, cu tur dia ta pone nan esfuerso y energia pa crea un espacio di siñamento inclusivo, stimulante y sano pa e alumnonan.
Ministerio di Educacion ta reitera su compromiso pa continua e colaboracion sercano cu e scolnan, cu e obhetivo di atende cu nan necesidadnan y eleva e calidad di educacion na tur nivel. E bishitanan aki ta mustra cu gobierno ta balora y tin como prioridad un dialogo continuo y uni cu e sector di educacion, reconociendo cu e trabou di nos educadornan ta esencial pa garantisa un futuro prospero pa Aruba.
