Minister Gerlien Croes, den su capacidad como Vice Prome Minister, lo presenta e agenda di inversion di Gabinete AVP-FUTURO na Parlamento diahuebs y diabierno awor.
E presupuesto di inversionan aki ta toca diferente areanan di Gobierno: digitalisacion di aparato publico, renovacion urbano, infrastructura, educacion, seguridad, desaroyo social, deporte y sostenibilidad.
Ta un agenda cu ta exigi decision, prioridad y responsabilidad pa Aruba den cuadro di Fondo General di Inversion y Desaroyo – AIOF 2026–2027, cual ley a wordo aproba recientemente.
Como Vice Prome Minister, Minister Croes hunto cu Minister di Finansas y otro coleganan Minister, ta asumi e responsabilidad institucional pa presenta y defende e direccion y agenda di inversion cu a prepara pa Aruba.
AIOF ta representa un instrumento importante pa transforma prioridadnan publico den inversionnan concreto. E introduccion di e ley inverscion aki ta parti di e acuerdo di gobernacion.
“Mi ta para dilanti Parlamento cu respet pa su rol, pero tambe cu conviccion den e responsabilidad cu nos tin pa sigui inverti den futuro di Aruba.”
Minister Croes ta enfoca su participacion den e debate riba responsabilidad democratico, transparencia y continuidad di gobernacion. Liderazgo no ta wordo midi solamente door di loke un hende ta bisa. Ta wordo midi door di e responsabilidad cu hende ta dispuesto di carga y ehecuta.
