Como Minister di Deporte, sra. mr. Gerlien Croes, a sostene recientemente un encuentro productivo cu representantenan di Comite Olimpico Arubano (COA) y Panam Sports, kende ta di bishita na Aruba.
Durante e reunion, a tene un dialogo ameno y fructifero enfocando riba desaroyo di deporte na nos isla, unda a explora diferente ideanan y oportunidadnan pa sigui eleva e nivel deportivo y amplia e posibilidadnan pa nos atletanan.
Panam Sports, representa pa su Presidente Neven Ilic y Secretaria General Jimena SaldaƱa, a expresa claramente nan disposicion pa colabora estrechamente cu Gobierno di Aruba y COA. E apertura pa cooperacion aki ta marca un paso importante pa impulsa progreso y crea mas oportunidad pa desaroyo deportivo na Aruba.
Un logro significativo pa Aruba ta cu pa prome biaha, nos pais ta anfitrion di e reunion di Comite Ehecutivo di Panam Sports, cu lo tuma luga diamars y diaranson. Durante e reunion aki, tur 30 miembro di e Comite Ehecutivo lo ta presente na Aruba pa participa den e deliberacionnan.
E echo cu Aruba a wordo escogi como sede pa un evento di e nivel aki, ta refleha confiansa den nos capacidad como pais pa organisa y acoge encuentro internacional di importancia, y ta confirma nos posicion como un socio activo den desaroyo di deporte den region.
āNos ta orguyoso di por ricibi Panam Sports na Aruba y di fortalece e lasonan di colaboracion cu COA. Hunto nos ta sigui traha pa crea un ambiente unda nos atletanan por desaroya nan talento y representa Aruba cu orguyo riba escenario local y internacionalā, segun Minister Gerlien Croes.
Gobierno di Aruba ta reafirma su compromiso pa continua na inverti den deporte como un pilar fundamental pa desaroyo social, salud y oportunidad pa nos comunidad.
