Ministerio di Relacionnan den Reino, Educacion, Hubentud, Innovacion y Deporte, conhuntamente cu Juliana School MAVO y e Talent Development Scheme (TDS) di Arubaanse Voetbal Bond (AVB) a desaroya e proyecto piloto innovativo titula “Proeftuin Gepersonaliseerd Onderwijs”. Den un colaboracion strategico, e iniciativa aki a wordo diseña pa crea un balansa harmonioso entre enseñansa secundario formal y e desaroyo intensivo di talento deportivo di alto rendimento pa e futbolistanan hoben na Aruba.
E programa ta basa riba e concepto caminda scol y deporte di alto rendimento no ta competi cu otro, sino ta complementa otro. E obhetivo principal ta pa ofrece e alumnonan aki e hermentnan pa nan por desaroya nan talento deportivo sin mester sacrifica nan exito academico.
Pa medio di guia personalisa, cada alumno-atleta ta haya un mentor stipula cu ta yuda cu planificacion y mantencion di e balansa entre scol, entrenamento, competencia y descanso. E programa por adapata por media di licenties na diferente nivel academico di e alumno. E ehecucion di e trayecto, e ritmo y e schedule di estudio ta wordo adapta na e calendario deportivo di e atleta. E programa piloto aki lo haci uzo di hermentnan digital y ‘learning analytics’ pa sigui e progreso academico di cerca y brinda apoyo necesario ora cu e alumnonan ta topa reto den nan progreso academico. Por ultimo, Juliana School, e staf di TDS y e mentor lo tin reunion regularmente pa monitorea y evalua e bienestar integral di e alumno.
E “Proeftuin Gepersonaliseerd Onderwijs” aki tin un funcion dobel: e ta sirbi como un solucion sostenibel pa e atletanan di TDS, pero tambe como un laboratorio di innovacion pa e sistema di enseñansa na Aruba. E experiencianan, evaluacionnan y conocemento cu wordo acumula durante e proyecto aki lo sirbi como base pa futuro desaroyo di maneho di educacion personalisa, flexibilisacion y digitalisacion den mas scol na nos isla, sirbiendo como un modelo pa futuro di enseñansa den e sistema Hulandes na Aruba pa transforma den un sistema di educacion mas digitalisa y personalisa pa e alumnonan.
Minister Gerlien Croes y Ministerio di Educacion completo ta gradici Juliana School MAVO y e Talent Development Scheme (TDS) di Arubaanse Voetbal Bond (AVB) pa e colaboracion den haci e programa piloto aki posibel y un realidad. Esaki ta un paso mas den e compromiso cu nos veld di educacion y e meta pa construi un entorno educativo mas fuerte, na bienestar di e generacionnan di awe y esnan cu ta bin den futuro.
