E anuncio di Congreso 2026 di Partido AVP ta marca un momento importante den historia di partido. Pa Wendrick Cicilia, lijsttrekker y actual Minister di Turismo, Transporte y Labor y un di e caranan di e generacion nobo dentro di AVP, e concepto Era di Relevo ta representa mas cu un cambio di liderazgo. E ta representa responsabilidad, continuidad y e deber di un generacion nobo pa sigui sirbi Aruba.
Durante conferencia di prensa, Lider di AVP Mike Eman a anuncia cu e proximo Congreso di partido lo ta e momento caminda oficialmente lo tuma luga e traspaso di liderazgo y responsabilidad na un generacion nobo. E Congreso lo tuma luga diadomingo 4 di october na Aruba Marriott Resort Grand Ballroom, cuminsando 9:00 am.
Pa Cicilia, e anuncio ta un momento cu ta nifica hopi, specialmente pa e generacion nobo cu durante añanan a haya oportunidad pa crece, prepara y asumi mas responsabilidad dentro di partido y comunidad.
“Relevo no ta simplemente ocupa e luga di otro persona. Ta acepta e responsabilidad pa sigui construi riba loke generacionnan anterior a logra, pero alabes tin e curashi pa adapta na e realidad y necesidadnan di Aruba di awe,” Cicilia a expresa.
Respetando e pasado, cu responsabilidad pa futuro
Cicilia ta considera cu un partido cu tin un historia manera AVP mester por honra su pasado sin perde di bista e futuro. Generacionnan anterior a construi un fundeshi basa riba servicio, responsabilidad, solidaridad y amor pa Aruba. E reto awo ta pa traduci e mesun balornan ey na e realidad di un generacion nobo.
“Nos tin hopi pa gradici na esnan cu a cana e caminda prome cu nos. Pero e miho manera pa honra nan trabou ta pa sigui dilanti. Cada generacion tin su propio retonan y cada generacion mester tin e curashi pa asumi su responsabilidad,” segun Wendrick Cicilia.
Pa e Minister, Aruba awe ta enfrenta un realidad cu ta exigi liderazgo cu ta cerca di hende, cu ta comprende e preocupacionnan di famianan y cu ta dispuesto pa busca solucionnan concreto. Tema manera costo di bida, oportunidad pa hobennan, enseñansa, trabou, vivienda y un economia cu ta crea oportunidad pa tur hende ta parti di e combersacion cu e siguiente generacion di liderazgo mester sigui hiba.
Un generacion cu mester ta cla pa sirbi
Pa Cicilia, e palabra relevo tambe ta trece un mensahe directo na e generacion nobo: oportunidad semper ta bin compaña pa responsabilidad.
“Nos generacion no por solamente pidi un oportunidad. Ora e oportunidad yega, nos mester ta cla pa demonstra cu nos por carga e peso di responsabilidad cu ne. Cu humildad, disciplina y principalmente cu e conviccion cu politica ta pa sirbi hende.”
Congreso di AVP lo brinda espacio pa e famia di partido reuni, reflexiona riba su trayectoria y formalisa e siguiente etapa den su liderazgo. Pa Cicilia, e momento aki no ta solamente importante pa e futuro di AVP, sino tambe un oportunidad pa reafirma e compromiso cu Aruba y cu e siguiente generacion.
“Un relevo no ta final di un historia. Ta un otro capitulo. Y nos responsabilidad ta pa garantisa cu e capitulo nobo ta uno cu nos pueblo por sinti representa aden.”
Congreso 2026 di Partido AVP lo tuma luga diadomingo 4 di october na Aruba Marriott Resort Grand Ballroom, cuminsando 9:00 am.
