Minister Gerlien Croes: OABA ta celebra e logronan di su studiantenan y ta reafirma su compromiso cu e desaroyo profesional na Aruba

Openbaar Avond Beroepsonderwijs Aruba (OABA) a presenta e resultadonan oficial di graduadonan pa e cohortnan 2024-2026 y 2025-2026. E otorgamento di diploma a tuma luga dia 8 di juli 2026, unda a celebra e esfuerso y e dedicacion di e studiantenan di e basis opleidingen y di e nivel 2-opleidingen.

Resultadonan di e Basis Opleidingen (Nivel 1) – Cohort 2025-2026

Den e basis opleidingen, un total di 51 studiante a cuminsa e aña escolar y 23 di nan a haya nan diploma, lo cual ta representa un rendimento di graduado promedio di 45%:

• Assistent Horeca, Voedingsindustrie (BBL): 15 studiante a cuminsa y 8 a haya nan diploma (53% di rendimento).
• Assistent Mobiliteitsbranche: 12 studiante a cuminsa y 6 a haya nan diploma (50% di rendimento).
• Assistent Dienstverlening: 13 studiante a cuminsa y 5 a haya nan diploma (38% di rendimento).
• Assistent Metaal-, Elektro- en Installatietechniek: 11 studiante a cuminsa y 4 a haya nan diploma (36% di rendimiento).

Avance den Nivel 2 y expectativa pa october 2026

Pa e cohort 2024-2026 di Nivel 2, e resultadonan na juli y e proyecion pa october ta lo siguiente:

• Eerste Monteur Elektrotechnische Installaties: 5 studiante a gradua na juli y ta spera 2 studiante mas na october.
• Monteur Koude- en Klimaatsystemen: 2 studiante a gradua na juli y ta spera 2 studiante mas na october.
• Medewerker ICT Support: Ta spera 3 studiante pa gradua na october.

Un grupo adicional di studiante lo gradua na october 2026 despues di completa nan BPV (practica), tareanan practico y parti di examen pendiente.

Retonan y contexto di educacion pa adulto

OABA ta enfatisa cu e resultadonan di graduadonan mester wordo evalua den e contexto unico di educacion pa adulto. Mayoria di e studiantenan ta combina nan estudio cu un trabou full-time, responsabilidad familiar y orarionan di trabou irregular. Esaki tradicionalmente ta haci cu e porciento di studiante cu ta stop nan estudio ta mas halto cu den enseñansa di dia regular. 

Populacion actual di studiante (Aña escolar 2026-2027)

Apesar di e retonan aki, OABA ta inicia e aña escolar nobo cu un base solido di 73 studiante activo. Esaki ta nifica un retencion positivo di 74%, cual ta un bon resultado pa educacion pa adulto:

• Eerste Monteur Installatietechniek NIVO 3: 17 studiante activo.
• KIA Project Assistent Metaal-, Elektro- en Installatietechniek: 16 studiante activo.
• Basis Technicus Voertuigen en Mobiele Werktuigen: 15 studiante activo.
• Eerste Monteur Elektrotechnische Installaties: 14 studiante activo.
• Helpende Zorg & Welzijn: 6 studiante activo.
• Monteur Koude- en Klimaatsystemen: 5 studiante activo.

Mirando cu e periodo regular di inscripcion ta continua, OABA ta spera un crecemento adicional den e populacion di studiante. Segun director general di OABA sr. Carlos Martinus, “OABA ta sigui duna un contribucion substancial den e desaroyo di trahadonan capacita pa Aruba. E populacion actual di studiante y e entrada spera ta duna nos confiansa pa e añanan escolar cu ta bin.”

Minister Gerlien Croes ta felicita tur e graduadonan cu a logra alcansa nan meta cu disciplina y perseverancia. Tambe nos ta desea tur studiante cu ta bay cuminsa cu nan trayectoria escolar hopi exito, motivacion durante e etapa aki, cu no semper lo ta facil, pero lo duna fruto na final.