Minister di Deporte, sra. mr. Gerlien Croes, ta informa cu instalacion di e total di seis (6) palonan di luz na Piscina Olimpico Roly Bisslik a wordo finalisa exitosamente como parti di un plan amplio di mantencion y renobacion cu lo y ta tuma luga na facilidadnan deportivo na Aruba.
Recientemente, e prome tres (3) palonan di luz a wordo renoba y instala, sigui pa instalacion y finalisacion di e otro tres (3), completando asina e proyecto di mantencion di iluminacion na e facilidad. E trabounan di mantencion y mehoracion a culmina algun dia pasa, resultando den un infrastructura mas moderno y sigur pa uzo di comunidad deportivo.
Minister Gerlien Croes a enfatisa e importancia di inversion continuo den mantencion di facilidadnan deportivo: “Como Ministerio di Deporte, nos ta reconoce cu infrastructura di calidad y sigur ta esencial pa promove participacion den deporte. Pa esey nos ta implementa y ehecuta un plan di mantencion pa garantisa cu nos comunidad por sigui practica deporte den un ambiente apropia”.
E sistema di iluminacion cu a ricibi su mantencion necesario lo contribui significativamente na siguridad, funcionalidad y accesibilidad di e piscina, permitiendo uzo mas amplio y eficiente, incluyendo durante oranan di anochi.
Minister Gerlien Croes ta reafirma su compromiso pa sigui inverti den infrastructura deportivo y pa sigui traha pa mehora e facilidadnan existente, cu e meta di promove un bida activo y saludabel na Aruba.
