A pesar cu Prome Minister Mike Eman no a por tabata presente durante Accion di Bario di diahuebs mainta den San Nicolas, e accion a sigui manera planifica y a conta cu participacion activo di e diferente departamento y servicionan di gobierno.
Debi na e fuerte temblor cu a dal Venezuela diaranson atardi, Prome Minister Mike Eman a dedica su diahuebs mainta na diferente reunion cu varios instancia competente pa coordina e preparacion di Aruba y determina di ki forma nos pais por brinda asistencia humanitario na e pais bisiña.
Mientras tanto, e team di Accion di Bario a sigui cu e recorido den e cayanan di San Nicolas. E diferente funcionario di Polis di Bario (KPA), Bureau City Inspector (BCI), GKMB, DPL, DOW y DTI a uni forsa pa realisa un accion grandi di limpiesa y atende diferente punto di preocucapcion den entre otro Prinsenstraat, Mauritsstraat, Adolf van Nassaustraat y Willem de Zwijgerstraat.
Durante e accion, e departamento y servicionan a evalua diferente situacion den bario, identifica puntonan cu merece atencion y tuma accion unda esey tabata posibel. E trabou conhunto entre e diferente instancia ta forma parti di e enfoke di Accion di Bario, unda nos Prome Minister ta bay directamente den comunidad pa mira e situacion y duna respuesta mas rapido posibel na e necesidadnan di e residentenan.
Accion di Bario ta un instrumento importante pa gobierno yega mas di cerca na comunidad y fortalece cooperacion entre e diferente servicionan publico. E iniciativa ta enfoca riba mehora e calidad di bida den nos barionan y mantene un contacto directo cu pueblo.
Gobierno ta gradici tur e funcionarionan cu, a pesar di e circunstancianan imprevisto di diahuebs mainta, a sigui cu compromiso y dedicacion pa haci e accion den San Nicolas un exito. E compromiso pa sigui traha hunto pa Aruba tin hop otro bario mas limpi, mas sigur y un Aruba mas dushi pa biba!
