Prome Minister di Aruba, sr. Mike Eman, hunto cu Vice Prome Minister y Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes, a representa Aruba durante e prome edicion di Kingdom Summit, un encuentro di alto nivel entre e gobiernonan di Aruba, Corsou, Sint Maarten y Hulanda, cu a tuma luga dia 17 y 18 di november 2026 na Sint Maarten.

E encuentro historico aki ta reuni representantenan di e cuatro paisnan autonomo di Reino Hulandes cu e obhetivo principal di fortalece cooperacion, promove dialogo habri y constructivo y identifica oportunidadnan pa aborda e retonan comparti cu e paisnan den Reino ta enfrenta.

Despues di hopi aña, e cuatro paisnan di Reino Hulandes a bolbe reuni na e nivel mas halto di gobernacion pa un dialogo conhunto tocante e futuro di Reino. Durante e encuentro, cada pais a brinda un declaracion tocante su situacion actual, prioridadnan y necesidadnan, creando asina un base pa identifica e asuntonan cu ta rekeri atencion y cooperacion conhunto. E Kingdom Summit a fungi principalmente como un plataforma pa reactiva e preparacionnan pa un futuro Conferencia di Reino (Rijksconferentie), cu e intencion pa den e proximo periodo defini un fecha y agenda pa e conferencia aki. Esaki ta representa un paso importante pa duna continuidad na e dialogo politico y cooperacion entre e cuatro paisnan.

Durante e Kingdom Summit, e enfoke ta riba e importancia di un cooperacion mas estrecho entre e cuatro paisnan, basa riba respet mutuo, confianza y reconocemento di e responsabilidadnan y autonomia di cada pais. E encuentro ta brinda un plataforma importante pa intercambia visionnan, comparti experencianan y explora solucionnan conhunto pa asuntonan di interes comun den reino.
Pa Aruba, participacion na e prome Kingdom Summit ta representa un oportunidad valioso pa sigui fortalece su posicion y relacionnan dentro di Reino Hulandes, mientras cu ta contribui activamente na e dialogo tocante e futuro di e cooperacion entre e cuatro paisnan.
Como Vice Prome Minister y Minister di Relacionnan den Reino, Minister Gerlien Croes ta enfatisa e importancia di mantene un dialogo continuo y constructivo entre e partnernan den Reino, unda e interesnan y particularidadnan di cada pais ta wordo respeta.
“E prome Kingdom Summit ta un oportunidad importante pa nos sigui construi riba e relacionnan entre e cuatro paisnan di Reino. Nos ta comparti un historia y hopi retonan, pero tambe oportunidadnan grandi pa traha hunto. Pa Aruba, ta esencial cu e cooperacion aki ta basa riba dialogo habri, respet mutuo y reconocemento di nos autonomia. Door di scucha otro, intercambia ideanan y identifica metanan comun, nos por sigui fortalece nos relacionnan y traha hunto pa un miho futuro pa nos ciudadanonan,” Minister Gerlien Croes ta expresa.
E participacion di Prome Minister Mike Eman y Vice Prome Minister Gerlien Croes ta reafirma e compromiso di Gobierno di Aruba pa mantene un rol activo y constructivo den e relacionnan dentro di Reino Hulandes. Gobierno di Aruba ta considera cu un cooperacion efectivo entre e cuatro paisnan por contribui na e fortalecemento di capacidad institucional, intercambio di conocemento y desaroyo di iniciativanan cu ta beneficia e ciudadanonan di Reino.
Adicionalmente, e Kingdom Summit ta brinda e oportunidad pa sigui promove un relacion di cooperacion unda cada pais por contribui for di su propio realidad, prioridadnan y potencial, cu e meta di identifica solucionnan sostenibel pa e retonan actual y futuro.
Minister Gerlien Croes ta destaca cu e importancia di e encuentro aki no ta limita solamente na e dialogo entre gobiernonan, sino tambe na e posibilidad di traduci e cooperacion den resultadonan concreto cu por tin un impacto positivo riba bienestar y calidad di bida di e habitantenan di e cuatro paisnan.
Cu e prome Kingdom Summit, Aruba ta reafirma su disposicion pa sigui participa activamente den e desaroyo di un Reino unda cooperacion, igualdad, respet y responsabilidad comparti ta forma e base pa progreso.
“Cu dialogo, respet mutuo y cooperacion, nos ta sigui traha hunto pa un Reino mas fuerte y un miho futuro pa nos tur!”





