Minister Gerlien Croes ta anuncia y a inaugura instalacion di structuranan multi-deportivo na scolnan: Colegio Santa Filomena y Colegio Frere Bonifacius: Mas deporte, mas movecion y mas oportunidad pa nos muchanan desaroya nan talento Deportivo na scol

Minister di Educacion y Deporte, sra. mr. Gerlien Croes, ta anuncia y a inaugura instalacion di structuranan multi-deportivo nobo na dos scol, cu Colegio Santa Filomena y Colegio Frere Bonifacius como e prome dos scolnan cu ta ricibi e structura multi-deportivo como parti di e iniciativa aki. E proyecto ta forma parti di e compromiso pa sigui fortalece infrastructura deportivo na nos scolnan y crea mas oportunidad pa nos muchanan practica deporte y haci movecion durante nan dia escolar.

Colegio Santa Filomena ta e prome scol cu a ricibi su structura multi-deportivo nobo, sigui pa Colegio Frere Bonifacius. E iniciativa aki ta solamente e comienso, ya cu mas scol rond Aruba lo sigui beneficia di facilidadnan similar.

Mas espacio pa move, mas oportunidad pa crece

Cu instalacion di e structuranan multi-deportivo, nos muchanan ta haya mas oportunidad pa practica diferente disciplina deportivo, manera futbol y basketball, den un ambiente escolar cu ta stimula movecion, cooperacion y desaroyo fisico.

Minister Gerlien Croes ta enfatisa cu deporte ta desempeña un rol fundamental den desaroyo integral di nos muchanan. Ademas di contribui na un bida saludabel, deporte ta siña nan disciplina, perseverancia, respet y importancia di traha hunto.

“Nos muchanan merece facilidadnan cu ta stimula nan pa move, descubri nan talento y desaroya nan potencial. Cu e structuranan multi-deportivo aki, nos ta crea mas oportunidad pa deporte forma parti di nan desaroyo diario. Nos vision ta pa cada mucha, independientemente di cua scol e ta atende, tin acceso na oportunidadnan pa practica deporte y crece den un ambiente positivo”, Minister Gerlien Croes a expresa.

Colegio Frere Bonifacius: inversion den bienestar mientras solucionnan pa alohamento ta den proceso na mes momento. Na Colegio Frere Bonifacius, instalacion di e structura multi-deportivo ta representa un paso positivo pa e comunidad escolar, mientras cu ta sigui traha pa busca solucion pa e situacion di alohamento di e alumnonan y docentenan.

Minister Gerlien Croes ta reconoce importancia di atende e necesidadnan di infrastructura escolar y ta enfatisa cu, paralelamente cu e esfuersonan pa soluciona e situacion di alohamento, ta esencial pa sigui inverti den bienestar y desaroyo di nos muchanan.

“Mientras cu nos ta traha pa soluciona e situacion di alohamento na Colegio Frere Bonifacius, nos no ta keda sinta warda. Nos ta sigui crea oportunidadnan pa nos muchanan por disfruta di deporte, haci movecion y desaroya nan talento. Nan bienestar y desaroyo ta keda un prioridad”, Minister Gerlien Croes a indica.

Un iniciativa cu lo sigui extende na mas scolnan

Minister Gerlien Croes ta reafirma su compromiso pa sigui amplia e iniciativa aki na mas scolnan rond Aruba, cu e meta di promove un cultura di deporte y movecion for di edad hoben.

E structuranan multi-deportivo ta brinda scolnan mas posibilidad pa integra actividadnan deportivo den nan programa diario, mientras cu nan ta stimula participacion, inclusion y un estilo di bida activo.

Minister Gerlien Croes ta expresa su aprecio na e directivanan y educadornan di Colegio Santa Filomena y Colegio Frere Bonifacius pa nan dedicacion diario na formacion di nos muchanan.

“Esaki ta solamente e comienso. Nos ta sigui traha pa mas scolnan por beneficia di e iniciativa aki. Cada espacio deportivo nobo ta representa un oportunidad pa un mucha descubri su talento, fortalece su confiansa y desaroya un pasion pa deporte”, Minister Gerlien Croes a conclui.

Mas deporte, mas espacio y mas oportunidad pa futuro di nos muchanan!