Durante oranan tempran di mainta, diferente instancia a traha den forma coordina pa atende un incidente cu un tuberia grandi di awa den area di waf, cerca di ex-Royal Plaza, y pa limita inconveniencia pa automobilistanan y comunidad.
E situacion a presenta despues cu durante anochi un tuberia di WEB a kibra den e area pariba di Casa Playa, anteriormente Royal Plaza. E fuga a causa un cantidad considerabel di awa cu a baha riba L.G. Smith Boulevard, afectando tambe condicion di e asfalt den e area.
Personal di WEB, Kimjen Construction VBA (sub-contratista), DOW y Cuerpo Policial Aruba (KPA) a presenta na sitio pa atende e situacion. Mientras WEB y e subcontratista a concentra riba controla e fuga y repara e tuberia, a tuma medida adicional pa mantene siguridad rond di e area afecta.
Debi na condicion di e caminda y e trabounan necesario, Cuerpo Policial a desvia trafico temporalmente pa evita riesgo y pa permiti e personal tecnico traha den forma sigur.
Minister di Husticia Arthur Dowers, cu tambe a presenta personalmente na sitio, a resalta importancia di e coordinacion entre e diferente instancianan, specialmente ora un incidente inespera por afecta un arteria importante di trafico.
“Den un situacion manera esaki, prioridad ta siguridad y pa e diferente instancianan por actua rapido y coordina. Mi ta aprecia e cooperacion entre WEB, DOW y Cuerpo Policial pa limita inconveniencia pa comunidad mas tanto posibel,” Minister Dowers a expresa.
Despues di 11’or di mainta, trafico por a bolbe na normalidad. Sinembargo, e trabou den e area ainda no ta completamente finalisa. Segun planificacion, entre diasabra marduga y diadomingo mainta tempran lo completa e siguiente fase, incluyendo asfaltamento di e parti di caminda cu a resulta afecta.
Minister Dowers ta gradici comunidad y automobilistanan pa nan pasenshi y comprension durante e desviacion temporal. Na mes momento, e ta expresa apreciacion na tur personal di WEB, DOW y Cuerpo Policial cu a responde y traha durante e oranan di mainta pa atende e situacion den forma rapido y profesional.
“E cooperacion entre e diferente servicionan ta importante precisamente den momentonan manera esaki: pa proteha siguridad, resolve e situacion y permiti comunidad bolbe na normalidad mas pronto posibel.”
