Ta trata consecuencianan fiscal di e cambio di tarifa entrante 1 di januari 2019
Recientemente a tuma lugar den corte fiscal un caso grandi relaciona cu e cobransa di Grondbelasting di aña 2019. Despues di varios veredicto, Corte di Casacion a tuma e prome decision pre-hudicial. Aki ta sigui un relato di e caso y e veredicto di Hoge Raad.
Ley di Grondbelasting
Ley di Grondbelasting ta indica cu ta otorga un cobransa anual riba propiedad inmobil na Aruba. Ta stipula e cobransa a base di e balor di propiedad, cual balor ta wordo determina pa un periodo di 5 aña. Normalmente cada aña un contribuyente ta ricibi un cobransa di Grondbelasting cu ta wordo calcula di acuerdo cu e balor stipula.
Cambio di ley na aña 2019
Como parti di e prome fase di Reforma Fiscal, e ley di Grondbelasting a conoce algun cambio grandi entrante 1 di januari 2019. Como consecuencia e tarifa di impuesto riba propiedad inmobil, entre otro pa terenonan comercial, a aumenta di 0,4% pa 0,6%. Alabes a elimina e suma liber di impuesto di Afl. 60.000.
E caso
E periodo di Grondbelasting den e caso specifico aki ta trata e añanan 2017 te cu 2021. E caso en cuestion ta trata di un contribuyente cu ta doño di un tereno y edificio comercial na Aruba pa cual propiedad inmobil el a ricibi un cobransa di grondbelasting, fecha 31 di mei 2019. Inspector di Impuesto a impone e cobransa aki a base di e tarifa nobo di 0,6%. E contribuyente no a bay di acuerdo cu e cobransa y a entrega un carta di obhecion na Departamento di Impuesto y despues a apela su caso na momento cu Inspector di Impuesto a duna un contesta negativo riba su carta di obhecion.
Preguntanan pre-hudicial
Un pregunta pre-hudicial ta un pregunta cu e hues ta haci na Hoge Raad tocante e interpretacion di un stipulacion di ley. Tin necesidad pa esaki ora cu Hoge Raad ainda no a emiti su opinion of veredicto riba e cuestion legal. Desde 2016, ta posibel pa tribunalnan y cortenan di apelacion haci pregunta pre-hudicial na Hoge Raad tocante casonan di impuesto.
E caso aki ta trata e prome caso di impuesto den cual Corte den Prome Instancia di Aruba a haci preguntanan pre-hudicial na Hoge Raad. E punto fundamental di e preguntanan pre-hudicial cu Corte den Prome Instancia di Aruba a haci na Hoge Raad ta trata e consecuencianan fiscal di e cambio di tarifa di 0,4% pa 0,6% entrante 1 di januari 2019 den e ley di Grondbelasting. E discusion principal ta trata e pregunta si e cobransa na e tarifa ahusta por a wordo imponi durante e periodo di 5 aña.
Cu e meta pa soluciona e disputa aki, Corte den Prome Instancia a puntra Hoge Raad un cantidad di pregunta pre-hudicial. Resumiendo, e preguntanan cu a wordo presenta na Hoge Raad ta trata (1) si e cobransa di Grondbelasting pa e tereno y edificio di 2019 por wordo imponi haciendo
uzo di e tarifa ahusta di 0,6%, y (2) si e ta asina, si e cambio di tarifa den e ley di Grondbelasting ta forma un intervencion inaceptabel riba e derecho di por gosa di bo propiedad inmobil sin wordo stroba den esaki.
Sentencia di Hoge Raad
E tribunal supremo ta di opinion cu e ley di Grondbelasting no tin como meta pa duna seguridad y stabilidad hudicial tocante e tarifa cu mester wordo aplica durante e periodo di 5 aña. E poder legislativo ta liber pa cambia e tarifa vigente na cualkier momento durante e periodo di 5 aña pa medio di un “Landsverordening”, cu ta un ley den su forma formal. E cobransa di 31 di mei 2019 cu a wordo emiti haciendo uzo di e tarifa aumenta di 0,6%, manera a ser menciona, no por wordo considera como un di dos cobransa cu ta inadmisibel pa e aña 2019.
E pregunta si e cambio di tarifa den e ley di Grondbelasting ta forma un intervencion inaceptabel riba e derecho di goso sin interupcion, di bo propiedad di manera menciona den articulo 1 di e Prome Protocolo di e Convencion Europeo pa e Derecho di Hende (EVRM) y den articulo I.19 di e Statuut, ta ser contesta negativamente pa Hoge Raad. E cobransa di Grondbelasting ta un intervencion riba e derecho aki cu en general ta ser hustifica. Segun hurisprudencia di e Corte Europeo, e intervencion aki mester respeta entre otro un “fair balance” entre e interesnan di e individuo y e interes general. Pa haci e evaluacion aki, ta importante pa considera si tin un relacion rasonabel y proporcional entre e medionan cual ta wordo uza y e meta di e cobransa. E poder legislativo tin un libertad hopi grandi pa evalua esaki segun Hoge Raad. E cambio di tarifa di Grondbelasting durante e periodo di 5 aña riba su mes no ta indica cu tin un interupcion den e “fair balance” of cu e cambio di tarifa ta constitui un intervencion prohibi riba e derecho di gozo sin interupcion di e propiedad.
Poder legislativo
Den sistema politico di e mayoria pais, e poder legislativo ta un di e tres poder mas importante, hunto cu e poder ehecutivo y e poder hudicial (trias politica). E tarea di e poder legislativo ta pa traha, cambia y aboli ley. Normalmente e poder aki ta wordo ehecuta door di un parlamento of un reunion legislativo cu ta consisti di e representantenan eligi door di pueblo.
E parlamento of reunion legislativo tin e autoridad pa traha ley riba diferente tereno, manera riba e tereno di impuesto, seguro social, educacion, cuido di salud, husticia y seguridad publico. E poder legislativo tin tambe e derecho pa aproba y controla e presupuesto di un gobierno.
E cambio di tarifa den e ley di Grondbelasting no ta pone riesgo na e principio di confiansa y siguridad legal. E ta den derecho di e poder legislativo pa cambia e tarifa inmediatamente pa medio di ley. E tribunal supremo ta sigui bisa cu e cambio di tarifa di Grondbelasting ta parti di reformanan fiscal cu e legislador a aproba pa asina tin un reparticion di impuesto mas balansa. Segun Hoge Raad e legislador a keda den e amplio espacio pa evaluacion pa medio di e seleccion cu e la haci.
Siguiente pasonan
Corte den Prome Instancia di Aruba lo mester tuma en cuenta e contesta di Hoge Raad den su sentencia pa cu e caso specifico aki y tur otro caso di Grondbelasting cu ta pendiente na corte. Inspector di Impuesto y otro huesnan cu tin casonan similar pendiente lo tuma e respuesta di Hoge Raad como guia pa finalisa e casonan pendiente. Ta conseha contribuyentenan pa paga nan debenan di Grondbelasting cu nan tin pendiente di 2019, 2020 y 2021 mas pronto cu ta posibel pa motibo cu nan tabata warda riba e veredicto specifico aki di Hoge Raad pa por haci esaki.Por lesa e veredicto completo di Hoge Raad via www.rechtspraak.nl ECLI:NL:HR:2023:488
