Minister Plenipotenciario mr. Ady Thijsen a haci un bishita di trabao na Zwolle. Akinan e mandatario entre otro a reuni cu representantenan di VNO-NCW Regio Zwolle y MKB Nederland regio Zwolle. E reunion aki tabata un idea di Burgemeester Snijders di Zwolle durante di su combersacion cu e tabata tin cu Minister Thijsen. Zwolle ta conoci pa su sector di empresa chikito y mediano y tambe pa e cantidad di empresanan di famia.
Minister Thijsen a duna un introduccion di su vision y maneho pa cu Arubahuis, unda cu Aruba mester ta mas visibel na Hulanda. Tambe e mandatario a bisa cu e ta mira e balor adicional di busca cooperacion cu municipionan, hogeschool y universidadnan, instituto y e sector commercial. Asina mira na yega na manera pa diversifica economia di Aruba. Pa e motibo aki Minister Thijsenta haya hopi interesante pa tende di e comerciantenan basa riba nan experencia, sugerencianan cu por ta util pa empresanan chikito y mediano na Aruba.
Un di e sugerencianan cu a bin riba mesa ta pa organisa un colectiva pa comerciante, basa riba e ehempel di VNO-NCW Regio Zwolle y MKB Nederland regio Zwolle cu ta independiente y tin su mesun fondonan. For di akinan por organisa un encuentro di network entre e colectiva, conhunto cu enseñansa (mbo, hbo y Universidad) y gobierno. Gobierno lo tin mas un rol den facilita esaki.
Un otro sugerencia ta pa organisa un evento cu banconan, instancianan financiero y inversionistanan pa akinan mira pa haya nan sosten pa e vision economico di Aruba y con esaki mester keda ehecuta.
Segun e representantenan di VNO-NCW Regio Zwolle y MKB Nederland regio Zwolle Aruba lo mester desaroya un vision cu ta caracteristica pa Aruba: autonomia (autarkico y fomenta exportacion) y mara esaki na bienestar general. Bienestar general ta e manera cu tur cos ta bini hunto: vivienda, trabao, bida, comercio y recreacion. Den esaki lo mester defini hopi skerpi kico ta e tarea: unda bo kier bai. Con bo por bira autarkico y kico esaki ta nifica pa comercio. Riba cual sectornan ta bai concentra pa stimula empresanan.
Banda di e sugerencianan cu e representantenan di VNO-NCW Regio Zwolle y MKB Nederland regio Zwolle a haci, nan a duna di conoce ta interesa pa haci un bishita di trabao na Aruba, conhuntamente cu partnernan den enseñansa y gobierno municipal di Zwolle pa comparti experencia y tambe pa trece dilanti puntonan practico y concreto cu yuda Aruba sigi padilanti.
Minister Plenipotenciario mr. Ady Thijsen a gradici e representantenan di VNO-NCW Regio Zwolle y MKB Nederland regio Zwolle pa e reunion, e bon sugerencianan y nan disposicion pa brinda sosten na empresanan chikito y mediano na Aruba pa crea aun mas oportunidad na bienestar di economia di Aruba.
