Diaranson Minister di Turismo, Transporte y Labor, mr. Wendrick Cicilia, a subi abordo di Legend of the Seas pa yama e crucero di Royal Caribbean bonbini durante su prome bishita na Aruba. E ceremonia oficial a inclui e tradicional intercambio di plakkaat conmemorativo. Como parti di e bishita, Royal Caribbean a entrega un total di 10,000 dollar na dos fundacion local cu ta traha pa proteha nos lama y bida marino.

Minister Cicilia a destaca cu Aruba ta un di e destinacionnan mas admira y cu loke ta distingui nos isla ta e cuido cu nos ta pone den proteha nos naturalesa. El a resalta tambe e diferencia cu cada bishita di un crucero ta haci den bida di e hendenan cu ta traha den e sector.

“Na momento cu un crucero yega Aruba, na waf tin hende cu ta ward’e cu masha entusiasmo pa ricibi nos bishitantenan y brinda nan servicio. Pa e hendenan aki y nan famianan, cada bishita ta haci un diferencia. Nos ta sumamente orguyoso di nos industria di crucero y nos ta comprometi cu su desaroyo, mientras cu nos ta sigui cuida nos isla”, asina Minister Wendrick Cicilia a expresa.

Durante e ceremonia, Minister Cicilia a reconoce e trabou di Aruba Ports Authority (APA) y Aruba Tourism Authority (ATA) pa fortalece e relacion cu Royal Caribbean, un colaboracion cu a trece hopi alegria y oportunidad na Aruba.

“Mi kier gradici tur e teamnan cu a haci e bishita aki posibel. Mi ta reconoce e liderazgo di Marc Figaroa na A.P.A. y Ronella Croes na A.T.A., y e trabou di nan teamnan di Royal Caribbean y di tur esnan cu a yuda ricibi nos bishitantenan. Cada persona tin un esencial den e bonbini cu Aruba ta brinda”, Minister Cicilia a añadi. 

Entre esnan presente na e ceremonia tabata Marc Figaroa, CEO di A.P.A., Ronella Croes, CEO di A.T.A., y Jo-Anne Arends, kende ta presidente di e Hunta di Supervision di ATA. Royal Caribbean Group tabata representa pa Wendy McDonald, Regional Vice President, Government Relations – Caribbean | Royal Caribbean Group y Melissa Morales, Assistant Vice President, Destination Development, Americas & EMEA | Royal Caribbean Group. McDonald tabata un di e ehecutivonan di Royal Caribbean cu a participa na PAMAC 2025, cu Aruba tabata anfitrion di dje.

Royal Caribbean a haci un donacion di 10,000 dollar na Stichting ScubbleBubbles – Aruba Youth for the Ocean y 10,000 dollar na Stichting Turtugaruba. E representantenan di ambos fundacion tabata presente pa ricibi e donacionnan.

E programa a inclui tambe un recorido abordo, organisa specialmente pa e delegacion gubernamental, durante e recorido Royal Caribbean a presenta su iniciativanan ambiental y su trabou riba sostenibilidad.