Apertura di un Aña Parlamentario nobo ta representa un oportunidad unico pa renoba perspectiva y reafirma compromiso cu e vision cu Gobierno tin pa futuro di Aruba. Durante apertura di Aña Parlamentario 2026-2027, Gabinete AVP-FUTURO a expresa den Parlamento su intencionnan y prioridadnan pa e periodo venidero y rumbo pa 2027.
Minister di Labor, Turismo y Transporte, mr. Wendrick Cicilia, ta satisfecho cu loke a logra durante e prome aña y mey di gobernacion y ta indica cu e periodo nobo ta un oportunidad pa sigui construi riba e fundeshi cu a bin ta traha riba dje pa 1 aña y mey.
Un di e prioridadnan importante ta un mercado laboral cu mester evoluciona hunto cu economia di Aruba, cu mas oportunidad pa capacitacion y un miho conexion entre educacion y necesidadnan real di mercado laboral.
Den e Aña Parlamentario nobo, Gobierno lo presenta un ley importante pa acopla salario minimo na e bestaansminimum. E principio ta cla: nunca mas un empleado mester traha pa un salario cu no ta cubri su subsistencia basico.
“Trabou mester brinda perspectiva. Nos kier un mercado laboral unda nos hende tin oportunidad pa sigui capacita y desaroya nan mes, pero tambe unda un hende cu ta traha por cubri su necesidadnan basico. Mester sinti progreso economico den calidad di bida di nos trahadonan y nan famianan,” Minister Cicilia a expresa.
“Nos a logra paso importante den e prome aña y mey, pero ainda tin trabou pa haci. Cu e Aña Parlamentario nobo nos ta renoba nos compromiso pa sigui crea oportunidad, fortalece nos mercado laboral y traha pa un Aruba unda progreso ta yega cerca cada trahado y cada famia.”
