Na clausura di Aña Parlamentario 2025-2026, lider di Fraccion di AVP, Jennifer Arends-Reyes, a reflexiona riba un periodo intenso di trabou, dialogo y responsabilidad. El a reafirma su compromiso pa sigui guia fraccion den representacion di pueblo y den buskeda di solucionnan cu ta mehora calidad di bida di ciudadano.
“Como lider di fraccion, mi ta orguyoso di e manera cu nos parlamentario y team a traha hunto. Nos a sostene iniciativanan positivo cu por trece cambio, particularmente pa esnan mas vulnerabel, y na mes momento cumpli cu nos responsabilidad di control critico y constructivo. Democracia no ta solamente papia; democracia ta scucha, actua y responde na necesidadnan di pueblo,” Arends-Reyes a expresa.
Bou di su liderazgo, Fraccion di AVP a mantene contacto directo cu ciudadano, organisacion, profesional y representante di diferente sector. E encuentronan aki a permiti fraccion tende preocupacionnan di famia, trahado, empresario y hoben, y hiba nan voz den Parlamento.
Educacion y bienestar di mucha a ocupa un posicion importante. Fraccion a boga pa mas sosten na famia, mihor condicion den enseñansa, profesionalisacion y digitalisacion. Den salud y bienestar social, atencion a bay pa cuido accesibel y humano, cuido di adulto mayor, pasadia, kinderopvang y servicio pa persona cu mester sosten adicional.
Siguridad tambe a keda un prioridad, cu atencion pa trafico, condicionnan den KIA, proteccion di costa y profesionalisacion di lifeguardnan. Riba tereno di infrastructura, fraccion a presenta pregunta y proposicion pa mehoracion duradero di caminda, iluminacion publico y facilidadnan comunitario.
“Inversion den infrastructura no ta solamente un gasto. Ta un inversion den siguridad, mobilidad y calidad di bida,” Arends-Reyes a enfatisa.
Reconociendo turismo como pilar principal di economia, Arends-Reyes y su coleganan a dialoga cu AHATA, hotelnan, operadornan di tour, inversionista y otro partnernan. Temanan manera calidad, sostenibilidad, oportunidad pa trahado local, prijs di cas, short-term rental y proteccion di naturaleza a wordo trata.
Segun Arends-Reyes, Aruba mester mantene su posicion di forma responsabel y cu beneficio pa pueblo. P’esey, fraccion tambe a sostene proyectonan cu ta conecta turismo, produccion local, economia circular y proteccion ambiental.
Den relacionnan di Reino, fraccion a sigui defende interes di Aruba den temanan manera supervision financiero, HOFA y participacion democratico. Cooperacion mester ta basa riba respet, igualdad y responsabilidad comparti.
Arends-Reyes a gradici su coleganan, empleadonan di Parlamento, prensa y cada ciudadano cu a comparti preocupacion, idea of experiencia.
“E trabou di Parlamento no ta termina ora reunion cera. Nos lo sigui controla, propone, dialoga y construi pa un Aruba mas sigur, social, sostenibel y cu mas oportunidad pa cada ciudadano. Pa nos, politica ta sirbi hende,” Arends-Reyes a conclui.
